Մառնեուլիի փակման առաջին իսկ օրվանից կենտրոնական իշխանության հետ տարբեր ուղղություններով ակտիվորեն աշխատել ենք, որպեսզի առկա մարտահրավերին արձագանքենք արագ և արդյունավետորեն: Այս մասին Վրաստանի Առաջին ալիքին ասել է Մառնեուլիի քաղաքապետ Զաուր Դարգալին:

Ինչպես նշել է Զաուր Դարգալին, այսօր ևս 525 մարդուց վերցրել են անալիզներ, ՊՍՐ թեստ, որի արդյունքները պարզ կլինի վաղը:

«Ընդհանուր առմամբ Մառնեուլիում մենք արդեն 1 600-ից ավելի անալիզ ենք վերցրել: Ունենք դրական դինամիկա և սպասում ենք վաղվա պատասխաններին: Հիշեցնենք, որ վարչապետը հայտարարել է մայիսի 18-ին Մառնեուլիի բացման վերաբերյալ և այս արդյունքները մեզ համար խիստ կարևոր են: Ուզում եմ ասել, որ սրա հետ մեկտեղ, մենք ակտիվ շարունակում ենք տեղեկատվական քարոզարշավը: Բնակավայրերում ակտիվ տեղաշարժվում է եռալեզու մեքենան և կորոնավիրուսի մասին ու այլ կարևոր հարցերի շուրջ տեղեկություն փոխանցում: Բացի այդ, ակտիվորեն բաժանում ենք ծալաթերթիկներ: Ուզում եմ նշել, որ Մառնեուլիի փակման առաջին իսկ օրվանից կենտրոնական իշխանության հետ տարբեր ուղղություններով ակտիվորեն աշխատել ենք, որպեսզի առկա մարտահրավերին արձագանքենք արագ և արդյունավետորեն: Ինչպես նաև, շատ կարևոր հարցերին տրվել են լուծումներ, որոնք անհանգստացնում էին բնակչությանը: Դրանք են ապրանքի բաժանումը, գյուղատնտեսական ապրանքի դուրս բերումը, բեռնափոխադրումները, բնակչության համար պաշարը և այլն: Ունենք բավական լավ արդյունք, ինչի համար ուզում եմ շնորհակալություն հայտնել կենտրոնական իշխանությանը և բոլոր այն աշխատակիցներին, ովքեր ակտիվ ներգրավածություն են ցուցաբերել: Ինչ խոսք մարտահրավերները դեռ առջևում են, մենք շարունակում ենք ակտիվ աշխատել, ամենօրյա կապի մեջ ենք բնակչության հետ և վաղը սպասում ենք լավ պատասխաններին», – հայտարարել է Զաուր Դարգալին:

Հեղինակ՝  Անժելլա Սարոյան