Казахстан ахада  Касым-Жомарт Токаев ишааицҳаз ала, атәыла арегионқәа зегьы рҿы аконституциатә аиҿкаара еиҭашьақәгылоуп, аха антитеррористтә операциа инагӡоит.  Атәыла ахада иофициалтә даҟьа ишану ала, атәыла анапхгара аҭагылазаашьа иахылаҧшуеит.

«Аҭыҧантәи аорганқәа аҭагылазаашьа иахылаҧшуеит, аха, атеррористцәа ҧыхьеиҧш абџьар рхы иадырхәоит, ауаа рмал ҧхасҭартәоит. Убри аҟынтә, атеррористцәа зегьы рықәхранӡа антитеррористтә операциа нагӡатәуп», — иануп аҳәамҭаҿы.

Иара убас, аҳәамҭаҿы ишазгәаҭоу ала, Казахстан аиҳабыра  аиҿкаара аиқәыршәараҿы рыцхрааразы атәылашҟа иаауеит аколлективтә шәарҭадара аиқәшаҳаҭра аиҿкаара амчқәа.

Казахстан Аҩнуҵҟатәи аусқәа рминистрра адыррақәа рыла, антитеррористтә операциа аан иҭахеит  26ҩык ауааҧсыра,  18ҩык аахақәа роуит, 3 нызқьҩык иреиҳаны аанкылоуп.