Австриеи Қырҭтәылеи рпарламентқәа рыбжьара аусеицура арҕәҕәара азыхиазаареи ҩ-ганктәии аганрацәалатәи форматқәа рҿы ҩ-тәылак реизыҟазаашьақәа рырҭбаареи иалацәажәеит Қырҭтәыла аҧыза-министр Иракли Ҕарибашвилии Австриатәи ареспублика Амилаҭтә хеилак ахада  Вольфганг Соботкеи реиҧылараҿы. Аганқәа рхаҭарнакцәа еиҧылеит Қырҭтәыла аҧыза-министр Австриатәи ареспубликаҿы ивизит аҳәаақәа ирҭагӡаны.

Аиҧылараҿы ишазгәаҭаз ала, Австриеи Қырҭтәылеи апарламенттә демократиақәоуп, уи аҵакы ду амоуп ҩ-тәылак рпарламентқәа рыбжьара аусеицура арҭбааразы. Иазгәаҭан Қырҭтәыла-Австриатәи апарламенттә аиҩызаратә гәыҧқәа русура аҵакы, аиҧылара алахәылацәа ишырҳәаз ала, арҭ агәыҧқәа рылахәылацәа ибзианы аус еицыруеит, ҩ-ганктәи авизитқәа закәанҧҵаратә органқәа реизыҟазаашьақәа ибзианы ирныҧшуеит.

Аиҧылараҿы иазааҭгылеит Қырҭтәыла европатәи аперспектива анашьара азҵаара. Аҧыза-министр ишиҳәаз ала, атәыла европатәи аперспектива анашьара афакт – кыршықәса рыҩныҵҟала иҟоу апрогресси аинтеграциа аҩаӡара ҳараки азхаҵароуп иаанаго. Иаҵшьны иазгәаҭан Қырҭтәыла активла аусура шынанагӡо акандидат астатус аиура амзызла Евроеидгылантә иаиуз абжьагарақәа рынагӡаразы.

Аиҧылара алахәылацәа Украина имҩаҧысуа аибшьреи арегион аҿы ашәарҭадара аҭагылазаашьазы уи иамоу анырреи иалацәажәеит.

Аҧыза-министр Австриатәи ареспублика Амилаҭтә хеилак ахада ҭабуп ҳәа иеиҳәеит Қырҭтәыла ахьыҧшымреи аҵакырадгьылтә акзаареи адгыларазы.