Қырҭтәыла аҧыза-министр Иракли Ҕарибашвили аҳәсеи, аҭынчреи, ашәарҭадареи азҵаарақәа рзы НАТО амаӡаныҟәгаҩ хада ихаҭарнак ҷыда Ирен Фелин дылҧылеит.

Аиҳабыра радминистрациаҿы имҩаҧгаз аиҧылараан аганқәа рхаҭарнакцәа НАТО иаарту ашәқәа аполитикеи Аҩадаатлантикатә алианс ашҟа Қырҭтәыла аинтеграциа апроцесси иалацәажәеит. Ишазгәаҭаз ала, аспирант астатус змоу Қырҭтәыла  алианс азы еснагь иҟан зыгәрагоу, аусура зылшо партниорс, ари атәыла алагала ду ҟанаҵеит азеиҧш евроатлантикатә шәарҭадара арҕәҕәара аус аҿы.

Аҧыза-министр ишазгәеиҭаз ала, Қырҭтәыла, еиуеиҧшым ахырхарҭақәа рыла, апартниор ҳасабала аус ауеит, НАТО алахәылацәа Қырҭтәыла иазыманшәалоу адгыларатә уснагӡатәқәа ирызкны ирыдыркылаз аӡбара дазыразуп, уи Қырҭтәыла ахыхьчаралшара иаҳа арҕәҕәара иацхраауеит.

Аганқәа рхаҭарнакцәа арегиони адунеи рҿы ашәарҭадара аҭагылазаашьеи уажәазы иҟоу апроблемақәеи ирылацәажәеит. Иаҵшьны иазгәаҭан Амшын еиқәа арегион ашәарҭадара арҕәҕәара аус аҿы Қырҭтәыла инанагӡо ароль ду.

Изхәаҧшыз азҵаарақәа иреиун Ауаҩытәыҩса изинқәа рыхьчара аҩбатәи амилаҭтә стратегиа, Қырҭтәыла аиҳабыра ари астратегиа шьақәдырҕәҕәеит  2022 шықәсазы, адокумент аҿы иарбоуп  2022-2030 шықәсқәа рзы имҩаҧгатәу ауснагӡатәқәа. Ишазгәаҭаза ала, астратегиаҿы акрызҵазкәа аҭыҧ ааннакылоит агендертә аиҟарара азҵаара, уи ала иазҧхьагәаҭоуп азинеиҟарареи антидискриминациатә закәани еиҧҟьарада аиҕьтәра.

Иара убас, аиҧылара алахәылацәа иазааҭгылеит „Аҳәсеи, аҭынчреи, ашәарҭадареи иазку ЕАР Ашәарҭадара ахеилак арезолиуциақәа рынагӡара  2022-2024 шықәсқәа рзтәи Қырҭтәыла амилаҭтә плани” „Аҳәса рзы амчылареи аҭаацәараҿы амчылареи иаҿагыло ақәҧареи амчылара зхызгаз ауаа рыхьчареи азы 2022-2024 шықәсқәа рзы имҩаҧгатәу ауснагӡатәқәа рплани”. Ишазгәаҭаз ала, аҩ-документк рҿы аконкреттә уснагӡатәқәа арбоуп, арҭ адокументқәа еиуеиҧшым аусхкқәа рҿы агендертә аиҟарара ацхраара иазкуп.

Аиҧылара рхы аладырхәит Қырҭтәыла иҟоу НАТО Апартниорцәа рофис анапхгаҩы Алеқсандр Виникови НАТО аҿы Қырҭтәыла ацҳаражәҳәаҩ Виктор Долиӡеи.