Евроеидгыла ахеилак ақырҭуа дипломатцәеи зранг ҳараку амаҵзуҩцәеи рзы авизадатә режим аанкылара иазку аӡбара рыдыркылеит.

Ари атәы иануп Евроеидгыла ахеилак апресс-релиз аҿы.

«Ахадаратә зинқәеи адемократиатә принципқәеи Евроеидгылаҟны аинтеграциазы зда ҧсыхәа иҟам ҭагылазаашьақәоуп. Ари апринципқәа иатәазымбо атәылақәа рофициалтә хаҿқәа Евроеидгыла алаларазы ирмариоу арежим рхы иадырхәар ҟалом», — иҳәеит Польша аҩныҵҟатәи  аусқәа рминистр  Томаш Семонак.

«Ари аӡбара ҳадаҳкылеит Қырҭтәыла ҵыҧх иаднакылаз  «Атәым анырра аартызаара иазку» азакәани    «Аҭаацәаратә принципқәеи зықәра наӡам рыхьчареи иазку» азакәанҧҵаратә пакети иаҭакны. Евроеидгыла агәаанагарала, ари азакәанҧҵара ақырҭуа жәлар ршьаҭанкылатә зинқәа еиланагоит. Қырҭтәыла иҟанаҵо ашьаҿақәа Евроеидгыла аинтересқәа ирҿагылоит. Иара убас, ари аӡбара ала, аҭынчратә демонстрантцәеи, аполиткицәеи, ихьыҧшым АИХқәеи рганахьала атәыла анапхгара имҩаҧырго арепрессиақәа рзы ақәҿыҭра ҟаҳҵеит», — иануп аҳәамҭаҿы.

Абжьааҧнытә паспортқәа змоу Қырҭтәыла атәылауаа, ҧасеиҧш, авизадатә режим рхы иадырхәар рылшоит.