Кезерашвили ателехәаԥшар ишиашоу аефир аҿы ишааицҳаз ала, аоппозициатә партиақәа аԥара рзоуижьҭуеит, аха урҭ рдекларациақәа рҿы Кезерашвили иҟынтә аԥара шроуа џаьргьы иарбам, ари азҵаара алабҿабара аҭахуп, – иҳәеит Қырҭтәыла апарламен вице-спикер Арчил Ҭалакваӡе.

Ҭалакваӡе иажәақәа рыла, афинансркра иадҳәаланы Кезерашвили иҟаиҵаз аҳәамҭа агәҭынчымра ҳзаанагеит.

“Иацы ақырҭуа уаажәларра ираиҳәеит амиллиардер закәантәи мҩала сҟалеит ҳәа. Қырҭтәыла Атәылахьчара аминистрра абиуџьет аҟынтә аԥара шиӷьычыз, аполитикатә партиақәеи аихқәеи изакәанымкәа аԥара шриҭо, иԥара ахыҵхырҭақәа шдырым ари иазкны акгьы имҳәаӡеит. Ииҳәаз зегьы имцуп. Кезерашвили иӡбахә зегьы ирдыруеит. Уажәы аоппозициаа рҟынтә иацы ииҳәаз иазкны аилыркаарақәа ҳарзыԥшуп”, – иҳәеит Ҭалакваӡе.

Қырҭтәыла Атәылахьчара ԥасатәи аминистр Давид Кезерашвили иацы ателеефир аҿы ишазгәеиҭаз, мраҭашәаратәи афланг иацхраауа ауаа маҷуп, иара урҭ дыруакуп, ақәԥара аҵыхәанаӡа наигӡоит.