Қырҭтәыла Апрокуратура ахаҭарнакцәа, амаҵзураҭыҧ ахархәарала, имцырку мҩала  аҧара рацәа агара афакт азы хҩык ааныркылеит.

Апрокуратура аинформациала,  ҩыџьа анотариусцәеи анотариус ицхырааҩи ацәгьауратә гәыҧ алахәылацәа ирыцхраауан закәандарала аҧара атәтәра аҿы.  Ари аус  ахьаҵраҧса ала ауадақәа ргара иазкуп.

Ацәгьауратә гәыҧ алахәылацәа ауадақәа дара иртәушәа рхы аарҧшны, ауаа ижьаны, аҧара рымырхуан, ари ахықәкы анагӡараҿы ирыцхраауан закәандара аиқәшаҳаҭрақәа еиқәзыршәоз анотариусцәа.

«Еиҿкаау ацәгьауратә гәыҧ алахәылацәа, анотариусцәа рыцхыраарала ауаа ижьаны,  закәандарала ирымырхит 2 686 700 лари, ари аус аҿы азарал роуит  94ҩык атәылауаа. Иаанкылоу ауааҧсыра ахара рыдуп  еиҿкаау ацәгьауратә гәыҧ аҧара рацәа аҕьычраҟны рыцхраара афакт азы, ари ацәгьауразы иазҧхьагәаҭоуп  7 шықәса инаркны  10 шықәсанӡа аҭакра», — иануп апрокуратура аҳәамҭаҿы.