«Азербаиџьани Қырҭтәылеи евроазиатә мҩала  Европеи Азиеи еимыздо алогистикатә маршрут аҧҵаразы арегионалтә усеицура арҕәҕәара апроцессаҿ ароль хада  нарыгӡоит», — иҳәеит Азербаиџьан аҧыза-министр  Али Асадов  «Абырфынтә мҩа» афорум аҿы данықәгылоз.

Иара иажәақәа рыла, Қырҭтәылеи Азербаиџьани иахьагьы, аполитикатә ганахьала мацара акәымкәа,  аекономикеи, аенергетикеи, атранспорти аусхкқәа рҿгьы игәрагоу партниорцәоуп.

«Ҳаҭыр зқәу Иракли, Қырҭтәыла аҧыза-министр, ҳаҭыр зқәу Никол, Шәамахьтәыла аҧыза-министр, иахьа абра иҟоу аделегатцәа зегьы, —  салам шәысҭоит, Қырҭтәыла аҧыза-министр ҭабуп ҳәа иасҳәар сҭахуп, ишаҧу еиҧш, ари афорумахь ҳааҧхьареи, гәыкала ҳадкылареи, ари аусмҩаҧгатә ибзианы аиҿкаареи азыҳәан. Сара еснагь гәахәарала Қарҭ саҭаауеит. Қарҭ есышықәса иаҳа-иаҳа иссирхоит   — ақалақь азҳареи аҿиареи иаҿуп, ҵыҧх инаркны иахьанӡа апрогресс ду убарҭоуп. Сынтәатәи афорум атематика аҵакы ду амоуп.  Аҵыхәтәантәи ашықәсқәа рзы ари афорум акрызҵазкәа жәларбжьаратәи платформас иҟалеит, ҳара арегионалтәи аглобалтәи зҵаарақәа ирыдҳәаланы ҳидеиақәа реиҭныҧсахлара ҳалшоит. Аҵыхтәантәи аамҭазы адунеиаҿ имҩаҧысуа ахҭысқәеи, аекономикатә усеицуреи атранспорттә усхки рҿы иҟоу апроблемақәеи  даҽазнык иҳдырбоит ари аиҧылара аҵакы ду шамоу», — иҳәеит  Али Асадов.