Адунеи идуӡӡоу  жәларбжьаратәи аҳаирбаҕәазақәа роператорцәа иреиу афранцыз авиациатә гәыҧ  Groupe ADP Қарҭтәи жәларбжьаратәи аҳаирбаҕәаза аҿиара иаланаҵоит  150 миллион адоллар.

Қырҭтәыла аҳаирбаҕәазақәа реидгылеи Қарҭтәи жәларбжьаратәи аҳаирбаҕәаза анапхгара азызуа  TAV Georgia зтәу агәыҧ Groupe ADP-и ирыбжьарҵаз аиқәшаҳаҭра инақәыршәаны,  ари агәыҧ, анеҩстәи хәышықәса рыҩныҵҟа,   ирҿыцу аҭагылазаашьақәа рыла аҳаирбаҕәаза ахархәара нанагӡоит.

Аиқәшаҳаҭра анапаҵаҩра ацеремониаҿы иҟан Қырҭтәыла аҧыза-министр Иракли Кобахиӡеи, аекономикеи иҭышәынтәалоу аҿиареи рзы аминистр Мариам Қвривишвилии, агәыҧ  Groupe ADP  ахантәаҩи агенералтә директори Филипп Паскали,  TAV Airports  ахада Серкан Каптани, иара убас, аҳәынҭқарратәи хазхаҭалатәи асекторқәа рхаҭарнакцәеи.

Қырҭтәыла аҳаирбаҕәазақәа реидгылеи  «TAV Georgia»-и ирыбжьарҵаз аиқәшаҳаҭра рнапы аҵарҩит Аҳаирбаҕәазақәа реидгыла агенералтә директор  Леван  Мосешвилии  «TAV Georgia» аменеџьер хада Ҭеа Зақариӡеи.

Ари аинвестициа Қарҭтәи жәларбжьаратәи аҳаирбаҕәаза акыраамҭалатәи иҭышәынтәалоу аҿиареи, аҳаирбаҕәаза аусуратә алшарақәа жәларбжьаратәи астандартқәа рҟынӡа рышьҭыхреи, арегионалтә авиациатә центр аҳасабала Қырҭтәыла апозициа арҕәҕәареи иазкуп.