«Аҧсни Аахыҵ Уаҧстәылеи ирыдҳәалоу аҭагылазаашьа цәгьа иазҧхьагәаҭаны, Қырҭтәыла агәҽанызаара еилаҳкаауеит», — иҳәеит Ҭырқәтәыла адәныҟатәи аусқәа рминистр Мевлуҭ Чавушоҕлу аформат 3+3 иадҳәаланы Қырҭтәыла Актәи аканал ажурналист ииҭаз азҵаара аҭак аныҟаиҵоз.

Урыстәыла ақырҭуа аҵакырадгьылқәа импыҵахаланы ирымоуп, жәларбжьаратәи аҧхықәрақәа нарыгӡом, абри аҩыза аҭагылазаашьаҿы зыӡбахәы ҳәоу аформат аҿы Урыстәылеи  Қырҭтәылеи русеицура шәышҧахәаҧшуа ҳәа ианиазҵаа, Мевлуҭ Чавушоҕлу иҳәеит Қырҭтәыла апозициа пату ақәҵатәуп ҳәа.

«Аханатә ишысҳәаз ала, аиҧылара аан ҳара х-ганктәи аформат ҳалацәажәон. Ҳара хықәкык ауп иҳамоу  —  арегион аҿы аҭынчреи аҭышәынтәалареи ашьақәыргылара.  Аекономикатәи алогистикатәи зҵаарақәа рҿы агәреибагара шьақәзырҕәҕәаша ашьаҿақәа ҟаҵатәуп. Аҧсни Аахыҵ Уаҧстәылеи ирыдҳәалоу аҭагылазаашьа цәгьа иазҧхьагәаҭаны, Қырҭтәыла агәҽанызаара еилаҳкаауеит.  Ҩ-ганктәи аформат аҿы ацәажәара алагара уадаҩуп, аганрацәалатә формат аҿы иаҳа имариазар ҟалап, аха, ҳара Қырҭтәыла апозициа пату ақәаҳҵароуп», — иҳәеит Мевлуҭ Чавушоҕлу  Қырҭтәыла адәныҟатәи аусқәа рминистр Давиҭ Залкалиании иареи реиҧылара ашьҭахь еицымҩаҧыргаз абрифинг аҿы.