Gürcüstanda ümumi karantin elan olundu - Ümumi karantin nəyi nəzərdə tutur
Hökumət fövqəladə vəziyyət çərçivəsində ölçülərin əhəmiyyətli dərəcədə sərtləşdirilməsinə dair qərar verdi. Bu qərar 2020-ci ilin 31 mart tarixindən, səhər 08:00-dan etibarən qüvvəyə minəcək. – bu barədə Gürcüstanın baş naziri, Qiorqi Qaxaria koronavirus ilə əlaqədar fəaliyyət göstərən Qurumlararası Koordinasiya Şurasının iclasının başa çatmasından sonra keçirilən brifinqdə bildirib.
İclas bu gün genişləndirilmiş formatda keçirilib və şura üzvləri ilə yanaşı iclasda paytaxt meri, nazirlər kabinetinin üzvləri və Xəstəliklərə Nəzarət üzrə Mərkəzin rəhbər şəxsləri iştirak ediblər.
“Fövqəladə vəziyyət çərçivəsində ölçülərin əhəmiyyətli dərəcədə sərtləşdirilməsi ilə bağlı qarar qəbul etdik. Xüsusilə vurğulamaq istəyirəm ki, biz faktiki olaraq ümumi karantin elan edirik və bu qərar 2020-ci ilin 31 mart tarixindən səhər saat 08:00-dan etibarən qüvvəyə minəcək.
Karantin sadalananları nəzərdə tutur:
– İstənilən növ ictimai nəqliyyatın, həmçinin metro da daxil olmaqla, həm şəhər və munisipalitet daxilində, eləcə də şəhərlər arasında hərəkətinə tam qadağa qoyulur.
– Səhiyyə Nazirliyinin tövsiyələrinin nəzərə alınacağı və avtomobildə sadəcə 3 nəfər olacağı halda bir tək yüngül avtomobillə, taksi də daxil olmaqla yerdəyişməyə icazə verilir. Bu zaman iki nəfər mütləq avtomobilin arxa oturacağında oturmalıdır. Qayda olduqca mühüm rekomendasiyadır və nəzərə alınmayacağı hallarda aidiyyəti dövlət orqanları tərəfindən müvafiq qərarlar veriləcək. Həmçinin, bir tək strateji əhəmiyyət daşıyan obyektlərin əməkdaşlarının təşkil olunmuş və təhlükəsiz şəkildə daşınmasına icazə verilir.
– Üç nəfərdən artıq insanın bir yerə toplaşması qadağan olunur. Bu halda ərzaq mağazaları və apteklər istisna təşkil edirlər. Burda da insanlar arasında iki metrlik sosial məsafə mütləq qorunmalıdır.
– Bununla yanaşı hökumət tərəfindən icazə verilən müəssisələrdə işləmə qaydası ayrıca olaraq yazılacaq və onların Səhiyyə Nazirliyi ilə razılaşdırılmış ayrıca protokolları olacaq. Biz bunu, iqtisadiyyatın fəaliyyətinin davam etməsi, eləcə də Gürcüstan iqtisadiyyatının malik olduğu potensiyalın dayanmaması, və əlbəttə ki, vətəndaşlarımızın iş yerlərini maksimal dərəcədə itirməmələri üçün edirik.
– Yaşı 70-dən yuxarı olan vətəndaşlarımızın, yaxındakı ərzaq mağazası, aptek və tibb müəssisələrinə getmələri halları istisna olmaqla, evdən bayıra çıxmaları qadağan olunur.
– Yaşı 70-dən yuxarı olan vətəndaşlarımızın tənha yaşadıqları hallarda, İqtisadiyyat və Səhiyyə Nazirliyi eləcə də yerli munisipalitetlər onlara yardım etmə məsuliyyəti daşıyırlar.
– Ən əsası- fövqəladə vəziyyət müddəti dövründə bütün Gürcüstanda faktiki olaraq ümumi karantin elan olunur. Saat 21:00-dan səhər saat 06:00-dək həm piyadaların, həm də nəqliyyat vasitələrinin şəhər və ölkə miqyasında hərəkətinə qadağa qoyulur. Faktiki olaraq bu, ölkə miqyasında saat 21:00-dan səhər saat 06:00-dək komendant saatının elan olunması deməkdir.
– Vətəndaşların yerdəyişməsinə nəzarət və onların sağlamlıq vəziyyətinin yoxlanılması, şəxslərin yerdəyişməsinə nəzarət və fövqəladə vəziyyət çərçivəsində sərtləşdirilmiş şərtlərin icraası və həmçinin ilkin termoskrininq məqsədi ilə Tbilisi, Batumi, Kutaisi, Rustavi, Poti, Zuqdidi və Qori şəhərlərində nəzarət məntəqələri fəaliyyət göstərəcək. Bu tədbirləri Daxili İşlər Nazirliyinin qüvvələri və onunla birlikdə Müdafiə Nazirliyinin müvafiq qurumları həyata keçirəcəklər.
– Daha bir vacib məsələ – hər bir vətəndaşın, şəhərdə hərəkət edərkən hər zaman şəxsiyyət vəsiqəsi üzərində olmalıdır”
Tərcumə edən: Sevinc Mustafayeva