Թբիլիսիի ինֆեկցիոն հիվանդանոցի բժշկական տնօրեն Մարինա Էզուգբաիայի հայտարարությամբ, Վրաստանում արձանագրված կորոնավիրուսի երեք նոր դեպքից մեկը բեռնատար ավտոմեքենայի վարորդն է, մնացած երկուսն արդեն հաստատված դեպքերի շփման շրջանակից են:

Էզուգբաիայի խոսքով, բեռնատար մեքենայի վարորդը գտնվում էր կարանտինում:

«Երեք նոր դեպքից մեկը բեռնատար ավտոմեքենայի վարորդն է, մնացած երկուսն արդեն հաստատված դեպքերի շփման շրջանակից են: Մեր կենտրոն նոր պացիենտի չեն տեղափոխել»,- նշել է Էզուգբաիան:

Մարինա Էզուգբաիայի խոսքով, Թբիլիսիի ինֆեկցիոն հիվանդանոցում այս պահի դրությամբ բուժում է ստանում կորոնավիրուսի 32 վարակակիր, ևս երկու պացիենտ ապաքինվել է և դուրս գրվել կլինիկայից:

Ինչ վերաբերում է ինֆեկցիոն հիվանդանոցում երեք ծանր պացիենտների վիճակին, Էզուգբաիայի խոսքով, դիտվում է դրական դինամիկա:

Բացի այդ, նրա փոխանցմամբ, այս պահի դրությամբ, կովիդ-կենտրոններում բուժումը շարունակում է 153 պացիենտ: