Առաջին համալսարանական կլինիկայի տնօրեն, Լևան Ռատիանիի խոսքով, Շատիլիի ճանապարհին տեղի ունեցած վթարի հետևանքով տուժած երեք անձի վիճակը ծայրահեղ ծանր է:

Նրա խոսքով, առանձնապես ծանր է երկուսի վիճակը, որոնց այս պահին վիրահատում են:

«Երեկ վթարի վայրից մեզ մոտ են տեղափոխել երեք կնոջ: Նրանց վիճակն այս պահին կրիտիկական է, մասնավորապես երկուսի վիճակը: Նկատվում է բացասական դինամիկա, նրանք ունեն ներքին արյունահոսություն, և այս պահին վիրահատում են: Երրորդ կնոջ վիճակը այս փուլում համեմատաբար կայուն է, սակայն նա մնում է վերակենդանացման բաժանմունքում: Նրանք ունեն կյանքի հետ անհամատեղելի վնասվածքներ: Նրանց միջին տարիքը 25 տարեկան է»,- ասել է Լևան Ռատիանին:

Շատիլիի ճանապարհին տեղի ունեցած վթարի հետևանքով զոհվել է 17, վիրավորվել երեք մարդ:

Ավտովթարը տեղի է ունեցել Դուշեթիի մունիցիպալիտետում, Բիսո գյուղի մերձակայքում: Ուղևորատար միկրոավտոբուսը ընկել է մոտ 80 մետր բարձրությունից:

Ներքին գործերի նախարարությունը հետաքննություն է սկսել Վրաստանի քրեական օրենսգրքի 276-րդ հոդվածով: