Մեր պարտքն է շարունակել ամրապնդել Վրաստանի անկախության կարևորագույն հենասյունը ՝ պաշտպանական ուժերի ուժեղացումը, պատրաստակամության մեծացումը, կարողությունների զարգացումը և պատշաճ կերպով գնահատել զինվորականներին, – այս մասին հայտարարել է Վրաստանի պաշտպանության նախարար Ջուանշեր Բուրչուլաձեն, ելույթ ունենալով Վրաստանի Անկախության օրվան նվիրված միջոցառման ժամանակ:

Նա շնորհակալություն հայտնեց գործադիր և օրենսդիր իշխանություններին, ՆԱՏՕ-ին, նրա անդամ և գործընկեր երկրներին, գլխավոր ռազմավարական գործընկերոջը՝ Ամերիկայի Միացյալ Նահանգների ներկայացուցիչներին,  վրացական բանակի նկատմամբ ցուցաբերած հատուկ ջանքերի համար:

Պաշտպանության նախարարը Անկախության օրվա առթիվ հատկապես շնորհավորեց զինծառայողներին: Նրա խոսքով, վրացական բանակը երեք տասնամյակ եղել է երկրի պաշտպանության հիմնական հենասյունը և մինչ օրս վայելում է քաղաքացիների վստահության ամենաբարձր մակարդակը:

«Վրաստանի պաշտպանության ուժերը վերաճել են ժամանակակից և մարտունակ ուժերի, որոնք միշտ պատրաստ են պաշտպանել հայրենիքը և հոգ տանել գլոբալ անվտանգության ամրապնդման համար», – ասել է Բուրճուլաձեն:

Իր խոսքում պաշտպանության նախարարը ընդգծեց վրացի զինվորականների ներդրումը ինչպես համաշխարհային անվտանգության ոլորտում, այնպես էլ եվրաատլանտյան ինտեգրման տեսանկյունից:

Ջուանշեր Բուրճուլաձեն հատկապես ողջունեց անկախության օրը զինվորական երդում տված ու Պաշտպանության ուժերին միացած նորակոչիկներին: Նախարարը հարգանքի տուրք մատուցեց հերոսներին, ովքեր իրենց կյանքը զոհաբերեցին անկախության, դրա պաշտպանության և միջազգային խաղաղության համար:

«Երկրի անկախությունն էլ ավելի կամրապնդվի և կուժեղանա մեր եվրաատլանտյան ինտեգրմամբ, որում Վրաստանի Պաշտպանության ուժերը զգալի ներդրում ունեն», – հայտարարել է Պաշտպանության նախարարը: