Թբիլիսիի ինֆեկցիոն հիվանդանոցի բժշկական տնօրեն Մարինա Էզուգբաիայի խոսքով, Վրաստանում գրանցված կորոնավիրուսի երկու նոր դեպքը ներմուծված է:

Նրա խոսքով, նոր հիվանդները բեռնատարի վարորդներն են:

«Վերջին օր ու գիշերվա ընթացքում գրանցվել է կորոնավիրուսով վարակման երկու նոր դեպք: Մենք ունեինք 951 դեպք, իսկ այսօր այդ թիվը դարձել է ​​953: Ապաքինվածների թիվը կրկին ավելացել է և կազմել 830:

Երկու նոր հիվանդները բեռնատարի վարորդներ են: Վերջին երկու շաբաթվա ընթացքում հիմնականում ունենք ներմուծված դեպքեր և վարակվածները հիմնականում բեռնատարի վարորդներ են, ներքին տարածում չունենք, ինչը շատ հուսադրող է»,- ասել է Էզուգբաիան:

Ըստ նրա, ապաքինվածների թիվը կրկին կազմում է վարակվածների 87 տոկոսը, իսկ կովիդ կենտրոններում այս պահին բուժվում է 108 հիվանդ:

Ինչ վերաբերում է Թբիլիսիի ինֆեկցիոն հիվանդանոցին, ապա այնտեղ նոր հիվանդներ չկան և բուժվում է 24 վարակակիր: