Թբիլիսիի ինֆեկցիոն հիվանդանոցի կլինիկական տնօրեն Մարինա Էզուգբաիայի խոսքով, կորոնավիրուսով վարակված առաջին հիվանդի կրկնակի թեստը տվել է բացասական պատասխան:

Նրա խոսքով, ինչ վերաբերում է երկրորդ հիվանդին, ում մոտ առաջին թեստի ժամանակ պատասխանը բացասական էր, այսօր կստանանք կրկնակի թեստի պատասխանը:

«Երեկ կեսօրին հայտարարվեց, որ մեր առաջին հիվանդը ապաքինվել է, նրա կրկնակի թեստը նույնպես բացասական էր: Ինչ վերաբերում է երկրորդ հիվանդին, ապա նրա մոտ առաջին թեստը բացասական էր, և այսօր սպասում ենք կրկնակի թեստի պատասխանին: Այդ մասին հավանաբար ձեզ կտեղեկացնի պարոն Թենգիզ Ցերցվաձեն: Հույս ունենանք, որ այնտեղ նույնպես լինի բացասական պատասխան»,-հայտարարել է Մարինա Էզուգբաիան:

Նա նաև չի բացառել, որ առաջին ապաքինված հիվանդը կլինիկայից դուրս գրվի այսօր:

Մարինա Էզուգբաիայի խոսքով, չնայած ապաքինվելուն, նա մեկ շաբաթվա ընթացքում պետք է մնա ինքնամեկուսացման մեջ: