Րոպեներ առաջ ավարտվել է Վրաստանի վարչապետ Գիորգի Գախարիայի գլխավորությամբ ստեղծված արտակարգ միջգերատեսչական համակարգող խմբի հանդիպումը: Արտակարգ խումբը  կառավարության ղեկավարն ստեղծել է Վրաստանում կորոնավիրուսի առաջին դեպքը գրանցվելուց անմիջապես հետո, որը գլխավորում է անձամբ:

Վարչապետը բոլոր գերատեսչությունների ներկայացուցիչներից լսել է մանրամասն տեղեկություն վարակի տարածումից խուսափելու տեսանկյունից ընթացիկ և նախատեսված միջոցառումների մասին:

Արտակարգ համակարգող խմբի հանդիպման ընթացքում որոշում է կայացվել ավիաչվերթի հետ միասին Իրանից սահմանափակել նաև ցամաքային ճանապարհով մուտքը: Նշված որոշման մասին արդեն տեղեկացվել է իրանական կողմը:

Վրաստանում գրանցվել է նոր կորոնավիրուսի առաջին դեպքը: Առողջապահության նախարար Էկատերինե Տիկարաձեի հայտարարությամբ, վարակը հաստատվել է Վրաստանի քաղաքացի, 50-ամյա մի տղամարդու մոտ, ով երեկ Իրանից Ադրբեջանի տարածքով ժամանել էր Վրաստան: Նրա վիճակը բավարար է: