Польша акультура аминистрра аанацҳаит Польша ауаажәларратә дырраҭареи, арадиои, аинформациатә агентра PAPи рнапхгара рамхра иазкны. Иара убас,  уахгьы-ҽынгьы аус зуаз ажәабжьы ҿыцқәа рканал  TVP INFO адыркит. Польша аҧыза-министр ҿыц Дональд Туск ипартиа  «Атәылауаҩратә платформа» ари аканал ахарарҵеит ҧасатәи анапхгаратә партиа адгылара.

Аҩашазы Польша апарламент ҿыц иаднакылаз арезолиуциаҿы аҳәынҭқарратә органқәа зегьы рахь ааҧхьара ҟарҵоит  «зыҧшра ҟамҵакәа атәылауаа аинформациа иаша рыҭареи аҳәынҭқарратә АИХқәа русуреи еиқәдыршәарц».

Ателерадиодырраҭара азҵаарақәа рзы Польша Амилаҭтә хеилак ахантәаҩы  Мацеи Свирски ишиҳәаз ала, ауаажәларратә АИХқәа рнапхгаҩцәа рамхра закәандароуп.

Польша Ауаажәларратә дырраҭара аофисахь инеит ҧасатәи анапхгаратә партиа  «Азини аиашареи» алахәылацәеи апартиа алидер Иарослав Качинскии. Дара ишырҳәаз ала, дара «ателехәаҧшрахьы иааит адемократиа ахьчаразы». Ахыбра аҧхьа азинхьчаҩцәа гылоуп.