Германтәыла жәаҩыла аидаратә машьынақәа рырныҟәцаҩцәа, урҭ рыгәҭа Қырҭтәыла атәылауаагьы, азабастовка иаҿуижьҭеи мызкы ҵит. Германтәыла Ауаажәларратә дырраҭара ZDF  адыррала, польшатәи атранспорттә еилахәыра иатәу  63 аидаратә машьынақәа  Генесс иҟоу автоаангыларҭаҿ игылоуп.

Амашьынарныҟәцаҩцәа аџьаусҧса роуаанӡа амаршрут анагӡара ргәы иҭам. Дара ишырҳәаз ала,  ҩымз еиҳаны  аулаҵахәы рмоуӡацт.

ZDF адыррала, иахьа, атранспорттә еилахәыра анапхгаҩи ицыз ауааҧсыреи азабастовка алахәылацәа рышҟа ианнеи, аҭыҧаҿы аҭагылазаашьа цәгьахеит. Аполициаҿ ишырҳәаз ала, дара амашьынарныҟәцаҩцәа мчыла амашьынақәа рымырхыр рҭахын. Азинхьчаҩцәа  20ҩык ааныркылеит, урҭ иреиуп атранспорттә еилахәыра анапхгаҩгьы. Арҭ ауаа ауаажәларратә аиҿкаара аилагареи, адцалареи, егьырҭ ацәгьаурақәеи рхарарҵоит.

ZDF аинформациа инақәыршәаны, аидаратә машьынақәа рырныҟәцаҩцәа апетициа рнапы аҵарҩит, дара Германтәылеи Польшеи  анапхгара рахь ааҧхьара ҟарҵеит рџьаустә ҭагылазаашьақәа ирыхәаҧшырц.