«Қырҭтәыла  аҭагылазаашьа иаҳа еиҕьзар ҳҭахын, — аиашаз, амзақәа рацәа ирылагӡаны ари атәыла ииашам ахырхарҭала ицон, аха, ари аҭагылазаашьа иаҳа еицәахаргьы ауан. Абри ауп ихадоу», — иҳәеит Европа Ахеилак Амаӡаныҟәгаҩ хада Ален Берсе Европа Ахеилак Апарламенттә ассамблеиаҿы швециатәи апарламент алахәыла Қырҭтәыла иазкны илҭаз азҵаара аҭак аныҟаиҵоз.

Лымкаала, швециатәи адепутат Азеда Роихан  Ален Берсе диазҵааит: «Ассамблеиа алахәылацәа Қырҭтәыла азҵаара даараӡа иаргәамҵуеит, шәаргьы Қырҭтәыла шәаныҟаз иаҵшьны иазгәашәҭеит уаҟа адемократиеи азакәан аиҳаӡареи аганахьала апроблемақәа шыҟоу, убри аҟынтә, сшәазҵаар сҭахуп: ҳара ҳусеицура иаҳа иҳарҕәҕәар ҳалшома? Уажәазы Қырҭтәыла европатәи амҩа азыхынҳәраҿы ҳацхраарц азыҳәан иаҳзеиҧшу апроцедура алагара иаамҭоума?»

Берсе ишиҳәаз ала, уажәы аимадарақәа иаҳа ирҭбаатәуп, адиалог азы ашанс иҟазароуп, аусура нагӡатәуп. Иара иажәақәа рыла, Қырҭтәыла анапхгаратә партиеи Қырҭтәыла аҧыза-министри драцәажәарц игәы иҭоуп.

«Уажәазы адинамика усҟак иҽеим. Аимадарақәа иаҳа ирҭбаатәуп. Ҳара активла аус еицааур ҳҭахуп. Шәара имҩаҧыжәгаз абжьыҭиреи ашәыдышәкылаз аӡбареи амандатқәа шьақәдырҕәҕәеит. Европа Ахеилак Апарламенттә Ассамблеиа апозициа еилкаауп. Уажәшьҭа ҳахәаҧшроуп, абри зегьы ашьаҭала ахырхарҭа иаша азыхынҳәра ҟалозар. Хара имгакәа Қырҭтәыла анапхгаратә партиеи аҧыза-министри срацәажәаны, еилыскаауеит амҩа иаша азыхынҳәразы зыҟаҵара ҳалшо. Шәара иқәшәыргылаз азҵааразы аҭак аиура азин шәымоуп. Анеҩстәи ашьаҿа аҟаҵара ма анеҩстәи аетап алагара заацәоуп ҳәа сгәы иаанагоит», — иҳәеит  Ален Берсе.