„Ақырҭуа гәахәтәы“ агәыҧ рыӡбарала,  ҳзинмчқәа шышьақәырҕәҕәоугьы,  иахьа инаркны ҳара Европа Ахеилак Апарламенттә Ассамблеиаҿы аусура ҳаҟәыҵуеит», – илҳәеит апарламенттә аиҳара алахәыла, Апарламенттә Ассамблеиаҿы ақырҭуа делегациа алахәыла Ҭеа Ҵулукиани.

Ҵулукиани ишылҳәаз ала, аделегациа азинмчы иазку азгәаҭа адкылара ҟаломызт, избанзар, уи  «Ақырҭуа гәахәтәы» алхыҩцәа – ажәлар реиҳара рыҧсахра ауп иаанаго.

“Мышқәак ирылагӡаны Апарламенттә Ассамблеиаҿы адебатқәа мҩаҧысуан, ҳпарламенттә делегациа азинмчы иазхарҵару иазхарымҵару  рыӡбон.  Қырҭтәыла апарламент аделегациа рзинмчы азхаҵара иаҿагылаз рацәан. Ари аплан зынамгӡахеит, акомитет аилатәараҿгьы, анеҩс, апленартә аилатәараҿгьы  306ҩык рҟынтә 43ҩык мацароуп ақырҭуа делегациа рзинмчы аанкылара иақәшаҳаҭхаз.  Убри аҟынтә, минуҭқәак раҧхьа, Қырҭтәыла апарламент аделегациа рзинмчы абжьыҭирашҟа иқәыргыланы, иазхарҵеит. Аха, ари адокумент рыдыркылеит азҧхьагәаҭарақәак рыла.  Азҧхьагәаҭарақәа рацәа ҳрықәшаҳаҭым, урҭ ииашам, ашьаҭа рыҵам. Актәи азҧхьагәаҭа ари ассамблеиа акомпетенциақәа ирҭыҵуеит, ҳтәыла асуверинитет еиланагоит, уи  1 120 000ҩык алхыҩцәа ргәазыҳәара  атәамбароуп иаанаго. Ари азҧхьагәаҭа ҳадаҳкылазҭгьы, уи  ҳалхыҩцәа, ҳтәыла ауааҧсыра реиҳара рыҧсахроуп иаанагоз. Убри аҟынтә, ҳара, Страсбурги Қарҭи иҟоу Қырҭтәыла апарламенттә делегациа алахәылацәа, ари азҵаара ҳахәаҧшын, „Ақырҭуа гәахәтәы“ агәыҧ рыӡбарала,  ҳзинмчқәа шышьақәырҕәҕәоугьы,  иахьа инаркны  Европа Ахеилак Апарламенттә Ассамблеиаҿы аусура ҳаҟәыҵуеит. Ақырҭуа жәлар иалырхыз аиҳабыра ииашамкәа, ҵаҵгәыркыда ашантаж рзуреи, ашаҳаҭгақәеи афактқәеи ратәамбареи, ҳтәыла ауааҧсыра раҳаҭыр лазырҟәо адискуссиақәеи иахьынӡанагӡахо, ҳпарламенттә делегациа ассамблеиа аусураҿы алахәызаара изакәызаалак ҵакык амам ҳәа иҳаҧхьаӡоит. Ҳәарада,  Қырҭтәыла, аҳәынҭқарра аҳасабала, Европа Ахеилак алахәылас иаанхоит”, – илҳәеит Ҵулукиани.