Gürcüstan siyasi hissədə NATO-nun fundamental prinsiplərini tam şəkildə bölüşür və NATO-nun tələblərinə cavab verir – bu barədə Gürcüstan Müdafiə Qüvvələrinin keçmiş komandanı, general-leytenant Vladimer Çaçibaia Gürcüstanın Birinci Kanalına bildirib.

Onun sözlərinə görə, Gürcüstanın müdafiə sahəsində apardığı islahatların NATO Hərbi Komitəsinin sədri tərəfindən etirafı sevindirici haldır.

“NATO siyasi və hərbi komponentlərdən ibarətdir. Hərbi uyğunluq baxımından Gürcüstan bir çox ölkələrlə müqayisədə NATO standartlarına daha uyğundur ki, bu da bu gün də davam edən və aparılan islahatlarla bağlıdır. Faktiki olaraq, hərbi nöqteyi-nəzərdən heç bir xəta yoxdur, yalnız mühüm hissə qalır – siyasi qərar, bunun nəticəsində də ölkə NATO-ya üzv ola bilər.

Siyasi qərarın isə müxtəlif yanları və siyasi şəraiti var ki, ölkəmizin də NATO-ya üzv olması bundan asılıdır. Gürcüstan siyasi hissədə NATO-nun fundamental prinsiplərini tam şəkildə bölüşür və NATO-nun tələblərinə cavab verir. NATO üzvü olan istənilən ölkənin gürcü əsgəri ilə işləmiş nümayəndələri bizim əsgərlərin yüksək peşəkarlığını qeyd edirlər. Bu peşəkarlıq düzgün islahatlar prosesində formalaşıb. Şadıq ki, Gürcüstanın müdafiəsində gedən proseslər NATO Hərbi Komitəsinin sədri tərəfindən tanınır.

Müdafiə qüvvələri həm institusional istiqamətdə xeyli təkmilləşmiş, həm də müdafiə silahlarının məqsədyönlü şəkildə əldə edilməsi və təkmilləşdirilməsi istiqamətində mühüm addımlar atılmışdır. Ölkənin təhlükəsizlik və müdafiə baxımından malik olduğu strategiyanın, müdafiə qabiliyyətinin plana cavab verməsi çox vacibdir. Biz NATO Hərbi Komitəsinin sədrindən bu etirafı bir daha eşitməyə şadıq. Proses davam edəcək, çünki bu gün Müdafiə Qüvvələri ən yaxşı komanda rəhbərliyinə malikdir” – deyə Vladimer Çaçibaiya bildirib.