İrakli Kobaxidze – Qanun pozuntusu cəzasız qalmamalıdır, cəmiyyət hakimiyyətin adekvat, uyğun, sağlam reaksiyasının olduğunu gördü
Cinayəti kimin törətməsindən asılı olmayaraq, istər sıravi vətəndaş olsun, istərsə də hüquq-mühafizə orqanının nümayəndəsi, istənilən halda qanun pozuntusunun cəzasız qalmaması bizim dəst-xəttimizdir – bu barədə Gürcüstanın Baş naziri İrakli Kobaxidze jurnalistin sualına cavab olaraq deyib.
Onun sözlərinə əsasən, cəmiyyət hakimiyyətin adekvat, uyğun və sağlam reaksiyasının olduğunu gördü.
“Bu kadrların yayılması çox yaxşıdır, çünki hakimiyyətə dərhal reaksiya vermək imkanı verildi. Bu, çox ağır hadisə idi və əlbəttə, dərhal hüquqi reaksiya verilməsi zəruri idi. Cəmiyyət hakimiyyətin bu ağır fakta adekvat, uyğun və sağlam reaksiyasının olduğunu gördü. Heç bir qanun pozuntusu, üstəlik bu tip qanun pozuntusu cəzasız qalmamalıdır. Hüquq-mühafizə strukturlarının maksimum dərəcədə peşəkar dəst-xəttlə işləməsi çox vacibdir. Bu, 2012-ci ildən sonra bizim hakimiyyətin gətirdiyi bir şeydir və maksimum dərəcədə qorumalı olduğumuz dəst-xəttdir. Artıq qəbul edilmiş bugünkü tədbir dəst-xəttimizin maksimum dərəcədə qorunub saxlanılmasına kömək edəcək” – İrakli Kobaxidze bildirib.
Baş nazirin sözlərinə əsasən, əvvəlki hakimiyyətin dövründə cinayətkarları nəinki cəzalandırmırdılar, əksinə, onlara havadarlıq edirdilər.
“Hakimiyyətin qanun pozuntusuna sağlam reaksiya verməsi peşəkar dəst-xəttin göstəricisidir. Mən sizə əvvəlki hakimiyyətin dəst-xəttinin necə olduğunu xatırlatmaq istəyirəm. Məsələn, Sandro Qirqvlianinin hadisəsində baş verənlər dəst-xətt idi. O vaxt cinayətkarları nəinki real olaraq cəzalandırmadılar, əksinə, onlar üçün istixana şəraiti yaratdılar. Əgər mənə belə, oxşar bir şeyin baş verdiyi və hakimiyyətin havadarlıq etdiyi faktı misal çəksəniz, bu, sağlam etiraz olar. Lakin mən sizə oxşar cinayətlərin törədildiyi və əvvəlki hakimiyyətin buna nəinki reaksiya vermədiyi, əksinə, cinayətkarlara havadarlıq etdiyi, onlar üçün istixana şəraiti yaratdığı çoxlu sayda fakt gətirə bilərəm. Qirqvlianinin işi bunu sübut edən yalnız bir nümunədir. Bizim dəst-xəttimiz fərqlidir, cinayəti kimin törətməsindən asılı olmayaraq, istər sıravi vətəndaş olsun, istərsə də hüquq-mühafizə orqanının nümayəndəsi, istənilən halda qanun pozuntusunun cəzasız qalmaması bizim dəst-xəttimizdir və sizə bəhs etdiyim dəst-xətt məhz budur” – İrakli Kobaxidze qeyd edib.
Prokurorluq Qoridə polislər tərəfindən vəzifə səlahiyyətini zorakılıq tətbiq etməklə aşma ittihamı ilə altı nəfəri saxlayıb.