İrakli Kobaxidze bildirib ki, Səhiyyə Nazirliyinin nümayəndələri və valideynlərin iştirakı ilə işçi qrupu yaradılacaq və bu qrup Duchenne Muscular Dystrophy olan uşaqların konkret dərman preparatları ilə təmin edilməsi məsələsi üzərində fəal işləyəcək.

Kobaxidzenin sözlərinə görə, Duchenne əzələ distrofiyasından əziyyət çəkən uşaqların valideynləri ilə ikinci görüş keçirilib və tərəflər konkret dərman vasitələri üzrə iş aparılması barədə razılığa gəliblər.

“Bu günkü görüşdə razılaşdıq ki, Səhiyyə Nazirliyinin nümayəndələri və valideynlərin iştirakı ilə işçi qrupu yaradılsın. Qrup uşaqların konkret dərmanlarla təmin olunması istiqamətində fəal işləyəcək. Bu görüşdə təminat üzərində iş başlanacaq konkret preparatlar üzrə ortaq mövqeyə gəldik. Həmin dərmanların alınması ilə bağlı yekun qərar müxtəlif amillər, o cümlədən əczaçılıq şirkətlərinin təklif etdiyi şərtlər nəzərə alınmaqla veriləcək.

Xüsusi işçi qrupu yaradılacaq, konkret iş prosesi başlayacaq və valideynlər prosesin gedişi barədə daimi şəkildə məlumatlandırılacaqlar. Müəyyən səbəblərə görə hazırda həmin dərmanların adlarını açıqlamırıq, lakin valideynlər bu barədə tam məlumat alacaqlar.

Görüşdə iştirak edən bütün valideynlərə, eləcə də bütün valideynlərə konstruktiv yanaşmalarına görə təşəkkür edirəm. Həmçinin Gürcüstanın səhiyyə nazirinə və nazirliyin əməkdaşlarına məsələnin dərindən araşdırılmasına görə minnətdarlığımı bildirirəm. Ümid edirik ki, bugünkü qərar uşaqların maraqlarının qorunması və təmin olunması üçün ən yaxşı zəmini yaradacaq”, – deyə İrakli Kobaxidze bildirib.