Gürcüstan Parlamentinin sədri Şalva Papuaşvili dünən “Xarici təsirin şəffaflığı haqqında” qanun layihəsinə qarşı etiraz aksiyasının təşkilatçılarının əslində kimlər olmasının ortaya çıxdığını bildirib.

Papuaşvili bunun, sonda tribunanı zəbt edən “Milli Hərəkat” olduğunu bildirib. Papuaşvilinin izahatına görə, bir daha aydın oldu ki, qeyri-hökumət sektorunun bir hissəsi faktiki olaraq “Milli Hərəkat”ın bir hissəsinə çevrilib.

“Qanun layihəsinə gəlincə, zənnimcə bu günlər, bu aksiyalar, aksiyaların təşkilatçıları, aksiyaların təşkilatçılarının qeyri-şəffaflığı bizə bir daha qanunun lazım olduğunu göstərmiş oldu. Bu günə qədər o texniki avadanlığı kimin maliyyələşdirdiyini, aksiyanın təşkilatçıları olduğunu deyən qeyri-hökumət sektorunun kim tərəfindən maliyyələşdirildiyini belə bilmirik. Dünən əslində bu aksiyanın təşkilatçılarının kimlər olduğunu gördük. Bu, “Milli Hərəkat”dır. Sonda tribunada onlar dayanmışdılar. Onlar ümumiyyətlə bu qanunun əleyhinə təbliğat ruhunun başında dururlar. Müvafiq olaraq, bir daha aydın oldu ki, qeyri-hökumət sektorunun bu hissəsi, əslində, “Milli Hərəkat”ın bir hissəsinə çevrilib. Artıq burada sərhədin aradan qaldırılmasından bəhs edilmir, sadəcə olaraq “Milli Hərəkatın” bir hissəsinə çevriliblər” – Papuaşvili açıqlayıb.