Gürcüstan Parlamentinin sədri Şalva Papuaşvili bildirib ki, aksiyalar zamanı peşəkarlıqla hərəkət edən, ifadə azadlığını və aksiyada iştirak edən vətəndaşların təhlükəsizliyini təmin edən hüquq-mühafizə orqanlarının əməkdaşlarına təşəkkür edir.

“Bu günlər ərzində ən yüksək peşəkarlıq nümayiş etdirən, bir tərəfdən ifadə azadlığının qorunmasını və aksiyada iştirak edən vətəndaşların təhlükəsizliyini təmin edən polisimizə təşəkkür edirəm. Həmçinin, radikal qrupların həm polisi təhrik etmək, həm də müxtəlif zorakı hərəkətlərə yol vermək cəhdlərinə şahid olduq, bu halda da mütənasib cavab verildi və ictimaiyyət bunu çox yaxşı gördü. Məhz bu səbəbdən Gürcüstan cəmiyyətinin göstərdiyi etimada görə polis liderlərdən biridir. Bundan irəli gələrək, hamını gələcəkdə də polislə əməkdaşlığa çağırıram. Bir daha polislərimizə təşəkkür etmək istəyirəm” – Şalva Papuaşvili bildirib.