Kosovonun şimal hissəsində zirehli maşınlarla silahlı şəxslər kəndə soxulub, polisə atəş açıb və Serb pravoslav monastırında məskunlaşıblar.

Reuters agentliyinin məlumatına görə, hücum Banska kəndində baş verib. Kosovo Polisinin məlumatına görə, atışma zamanı bir zabit və üç hücumçu həlak olub. Polisin məlumatına görə, hücumda ümumilikdə 30 nəfər iştirak edib. Hazırda onlar monastırda məskunlaşıblar, artıq hüquq-mühafizə orqanları bir neçə saatdır ki, onları mühasirəyə alıblar. Serb kilsəsinin məlumatına görə, rahiblər və zəvvarlar monastır kilsəsində qapalı saxlanılır.

Kosovo hökuməti insidentdə “Serbiya tərəfindən maliyyələşdirilən cinayətkarları” günahlandırsa da, hücumun arxasında kimin olduğu məlum deyil.

“Onlar peşəkardır, hərbi və polis təcrübəsi olanlardır”, – Monastırı zəbt edən silahlı şəxsləri təslim olmağa çağıran Kosovo Baş naziri Albin Kurti deyib.