Rusiya Təhlükəsizlik Şurasının katibi Nikolay Patruşev bildirir ki, Qərbin “dağıdıcı hərəkətləri” səbəbindən nüvə silahından istifadə təhlükəsi artıb. Bu barədə Nikolay Patruşev MDB-yə üzv ölkələrin Təhlükəsizlik Şurası katiblərinin Moskvada keçirilən iclasında bildirib.

“ABŞ siyasətinin dağıdıcılığının təbii nəticəsi qlobal təhlükəsizliyin pisləşməsidir. Onların məsuliyyətsiz hərəkətləri təkcə köhnə böhranların alovlanmasına kömək etmir, həm də yeni böhranların yaranmasına və indi Yaxın Şərqdə müşahidə etdiyimiz münaqişələrin sülh yolu ilə həllinə mane olur” – Rusiya Təhlükəsizlik Şurasının katibi bildirib.

Onun sözlərinə görə, ABŞ siyasəti terrorizm, narkotik ticarəti və transmilli mütəşəkkil cinayətkarlıq da daxil olmaqla ümumi təhdid və çağırışların böyüməsini təşviq edir.

“Nüvə, kimyəvi və bioloji silahlardan istifadə təhlükəsi artır. Kosmos və kiberməkan sürətlənmiş templə hərbiləşdirilir” – Patruşev bildirib.