Gürcüstanı tanımaq mənim üçün əlifbası, dili, mədəniyyəti ilə gizli bir xəzinənin kəşfidir, – şair, ifaçı və nasir, Qenuya Beynəlxalq Poeziya Festivalının bədii rəhbəri Klaudio Potsani deyir.

Onun sözlərinə görə, gürcü mədəniyyətini şair Dato Maqradzenin köməyi ilə tanıyıb.

“Mənim üçün Gürcüstan haqqında danışmaq, Nunu Qeladzeyə təşəkkür etməli olduğum sevgi hekayəsindən danışmaq deməkdir. Mənə bu gözəl ölkəni, bu gözəl mədəniyyəti tanıdan o oldu. Həm də o, məni böyük gürcü müasir şairi Dato Maqradze ilə tanış etdi. Sonralar mənə Dato Maqradzenin köməyi ilə gürcü mədəniyyətinə, gürcü poeziyasına daha yaxın olmaq imkanı verildi. Nunu Qeladzenin tərcüməsi ilə şeirlər toplusunu təqdim etmək üçün Tbilisiyə gələndə bu ölkəyə, gürcü mədəniyyətinə məhəbbətim elə o vaxt yarandı. Bundan sonra mən də öz növbəmdə Gürcüstanı Qenuyaya gətirməyə və beləliklə, bu iki ölkə arasında bir növ mədəni körpü yaratmağa çalışdım”, Klaudio Potsani deyir.

Onun sözlərinə görə, Dato Maqradze ilk dəfə Qenuya festivalına dəvət alıb və sonrakı illərdə “Canlı kitablar” beynəlxalq layihəsi çərçivəsində festivala bir çox başqa gürcü şairləri də qatılıb.

“Gürcüstanı tanımaq mənim üçün əlifbası, dili və mədəniyyəti ilə gizli xəzinənin kəşfidir, o, italyan əlifbasından və mədəniyyətindən çox uzaqdır, təbii ki, amma buna baxmayaraq, mən Tbilisiyə ilk dəfə gələn kimi dərhal sehrli, qohumluq hiss etdim. Buna görə də istərdim ki, qoy gürcü dostlarım, gürcü şairləri də Qenuyada eyni hissləri keçirsinlər. Bu il mənim festivalım Qenuyada 29-cu dəfə keçirilir. Bu, bütün İtaliyanın ən qədim və ən böyük festivalıdır, baxmayaraq ki, bu, təkcə poeziya festivalı deyil, biz həm də poeziya ilə bağlı incəsənətin digər sahələrini – musiqini, kinonu təqdim edirik. Məhz buna görə də gələn il 30 illik yubiley festivalını keçirəcəyimiz zaman bu festivala təkcə şairləri deyil, Gürcüstanın incəsənət sahəsinin ən yaxşı nümayəndələrini dəvət etmək, Gürcüstanı festivalın mərkəzinə çevirmək mənim arzumdur. Ümid edirəm ki, bununla da İtaliyadakı təvazökar səfir kimi Gürcüstana xidmət edə biləcəyəm”, – Klaudio Potsani deyir.