Gürcüstanın müdafiə naziri İrakli Çikovani Gürcüstan Müdafiə Qüvvələrinin hərbi bazalarındakı mövcud vəziyyətlə tanış olur. O, ilk səfərini Vazianidə yerləşən Müdafiə Qüvvələrinin Şərq Komandanlığının 4-cü Piyada Briqadasına edib.

Müdafiə Qüvvələrinin komandanı, general-mayor Qiorqi Matiaşvili və Müdafiə Qüvvələrinin rəhbərləri tərəfindən İrakli Çikovani hərbi bazadakı vəziyyətlə tanış edilib. Şərq komandanı, briqada generalı Roland Dzneladze müdafiə nazirinə Şərq Komandanlığının strukturu, vəzifələri və məqsədləri haqqında təqdimat təşkil edib. Nazir cari layihələr barədə ətraflı məlumat alıb. İrakli Çikovani gələcək planların uğurla həyata keçirilməsində müdafiə qüvvələrinin nümayəndələrinə dəstəyini ifadə edib.

Müdafiə naziri hərbi bazanın nümayiş meydançasında təqdim olunan hərbi texnika, silah və texnikaya baxış keçirib. Nazir həyata keçirilən və davam edən infrastruktur layihələri, hərbi qulluqçuların yaşayış şəraiti ilə tanış olub. Qurumun rəhbəri hərbi hissənin ərazisindəki kazarma, xəstəxana, simulyasiya mərkəzi, idman zalı və silah anbarlarına baş çəkib.

Nazir hərbi qulluqçuların ərzaqla təminatı şəraiti ilə də tanış olub, şəxsi heyətlə nahar edib.

Məlumatı Gürcüstan Müdafiə Nazirliyinin mətbuat xidməti yayır.