Gürcüstanın Baş naziri İrakli Kobaxidze Amerika Birləşmiş Ştatlarının dövlət katibinin Avropa və Avrasiya məsələləri üzrə köməkçisi Cim O`Brayen ilə görüşüb.

Son bir neçə ildə Gürcüstanda inkişaf edən proseslər də daxil olmaqla gürcü-Amerika münasibətlərinin bütün məsələləri ətrafında səmimi söhbətin aparıldığı uzunmüddətli görüş keçirildi. Hökumət başçısı və ABŞ dövlət katibinin köməkçisi bu proseslərlə əlaqədar narahatlıqlarını bir-biri ilə bölüşüblər.

İrakli Kobaxidze həmçinin Cim O’Brayenə “Xarici təsirin şəffaflığı haqqında” qanunun qəbul edilməsinin zəruriliyini izah edib və hakim komandanın veto proseduru çərçivəsində beynəlxalq tərəfdaşların bütün hüquqi iradını diqqətlə nəzərdən keçirməyə hazır olduğunu bir daha bildirib.

Baş nazir Gürcüstan hakimiyyətinin ABŞ ilə tərəfdaşlığın dərinləşməsində maraqlı olduğunu, bunun isə qarşılıqlı səylər və ədalətli münasibətlər tələb etdiyini qeyd edib.

Məlumatı Gürcüstanın Hökumət Administrasiyası yayır.