19 sentyabr Hərbi Aviasiya Günüdür. Gürcüstan Müdafiə Nazirliyi tərəfindən verilən məlumatda gürcü hərbi aviasiya tarixinin 1918-ci ilin avqustun 20-də Gürcüstan parlamentinin qərarı ilə ilk gürcü hərbi aviasiya birliyinin yaradılması ilə Gürcüstan Demokratik Respublikası dövründən başladığı deyilir.

“1921-ci ilin fevralında gürcü hərbi pilotları sovet işğalına qarşı aktiv şəkildə döyüşürdülər və Tbilisi yaxınlığında düşmənə bir neçə uğurlu hücumlar həyata keçirdilər. Gürcüstan müstəqilliyini bərpa etdikdən sonra 1992-ci ildə silahlı qüvvələrdə Hərbi Hava Qüvvələri və 1993-cü ildə əsas idarəyə çevrilən Hava Hücumundan Müdafiə İdarəsi yaradıldı. 1995-ci ildə Gürcüstanın Helikopter Aviasiya Alayı Hərbi Hava Qüvvələrinə qoşuldu. 1998-ci ildə Hərbi Hava Qüvvələri və Hava Hücumundan Müdafiə Qüvvələri birləşdirilərək ona Hərbi Hava Qüvvələri adı verildi. 2010-cu ilin yazında Hərbi Hava Qüvvələri aviasiya briqadası şəklində Quru Qoşunlarının tabeçiliyinə keçdi. Hazırda, aviasiya və hava hücumundan müdafiə komandanlığı Gürcüstanın Müdafiə Qüvvələrinə tabedir” -deyə Müdafiə Nazirliyinin məlumatında qeyd olunur.

Nazirlikdən verilən məlumatda 1992-ci ilin məhz bu günü gürcü aviasiya bölməsinin iki ədəd Su-25 tipli qırıcı təyyarə ilə təchiz edildiyi və polkovniklər İzani Tsertsvadze və Valeri Nağopianın ilk uçuşu həyata keçirdikləri deyilir.

“1992-1993-cü illərdə Gürcüstan Hərbi Aviasiyası Abxaziyada davam edən hərbi əməliyyatlarda fəal iştirak edib, bu müddətdə Gürcüstanın Su-25 qırıcıları 217, helikopterləri isə 360 döyüş uçuşu həyata keçiriblər.

Gürcü Hərbi Aviasiyası 2008-ci ildə Rusiya-Gürcüstan müharibəsində fəal iştirak edib, gürcü qırıcı təyyarələri və helikopterləri düşmənin piyada və zirehli birləşmələrinə bir sıra uğurlu hücumlar həyata keçiriblər. Son zamanlar gürcü hərbi aviasiyasında pilotların və mühəndis-texniki heyətin kvalifikasiyası və döyüş hazırlığının səviyyəsi xeyli yüksəlib ki, bu da NATO və tərəfdaş ölkələrlə təlim və təlimlər baxımından uzun illər davam edən əməkdaşlıq əsasında həyata keçirilib. Müttəfiq ölkələrin köməyi ilə gürcü hərbi təhsil sistemi təkmilləşdirilmiş, nəticədə Gürcüstanın Milli Müdafiə Akademiyası və Qiorqi Antsuxelidze adına Çavuşlar Hazırlıq Məktəbi müasir tələblərə uyğun aviasiya zabitləri və çavuş kadrları hazırlayır “-deyə Müdafiə Nazirliyinin məlumatında deyilir.