Gürcüstanın Birinci Kanalının baş direktoru Tinatin Berdzenişvili Ermənistanın Televiziya və Radio Komissiyasının rəhbərlərini və Gürcüstanın Kommunikasiya Komissiyasının üzvlərini qəbul edib.

Görüş çərçivəsində Tinatin Berdzenişvili erməni həmkarlarını yayımçının fəaliyyəti ilə tanış edib. İki ölkənin televiziyalarındakı mövcud yeniliklər və çağırışlardan bəhs olunub.

“Çox maraqlı görüş keçirdik. Regionda nə qədər ümumi cəhətlərimiz və birgə işləmək üçün nə qədər imkanımızın olduğuna bir daha əmin oldum. Biz birgə istehsala xüsusi diqqət yetirdik, çünki erməni mediası seriallarla zəngindir və media sənayesi bu baxımdan çox mütərəqqidir, bu səbəbdən Gürcüstandan da qrupların aktiv şəkildə əlaqələndirilməsini müzakirə etdik. Çoxlu ortaq cəhətlərimiz var və məhz bu ortaq cəhətləri göstərməliyik. Ümumiyyətlə, media sahəsində çoxlu ümumi problemlərimiz var, lakin uzaq ölkələrdən deyil, çox yaxın qonşuluqdan bölüşə biləcəyimiz təcrübə də var”- deyə Tinatin Berdzenişvili bildirib.

Ermənistanın Televiziya və Radio Komissiyasının sədri Tiqran Hakobyanın sözlərinə görə, o, sonuncu dəfə Gürcüstanın Birinci Kanalında 15 il əvvəl olub və o vaxtdan bəri çox şey dəyişib.

“Təəssürat altındayam. Ölkələrimizin yayımçılarının tərəqqi, uğur və çağırışlar baxımından çoxlu ortaq cəhətlərə malik olduğunu gördük. Dost ölkənin televiziyasının və televiziyamızın çox yaxşı işlədiyinə şadam. Bu səfərlə bir daha öz ehtiramımızı göstərdik və birgə layihələrin, məlumat və təcrübə mübadiləsinin mütləq davam edəcəyinə əmin olduq. “İctimai Yayımçıya həmişə tamaşaçılar üçün etibarlı və obyektiv məlumat təminatçısı olmasını arzulayıram”- deyə Tiqran Hakobyan bildirib.

Ermənistan Respublikasının Televiziya və Radio Komissiyasının nümayəndələri Gürcüstanda iki günlük işgüzar səfərdədirlər. Tənzimləyicilər arasında media və media savadlılıq sahəsində əməkdaşlığın genişləndirilməsi məqsədilə qarşılıqlı anlaşma memorandumu imzalanıb.