Bu gün, Yaponiyada Gürcüstan millisi Tbilisi vaxtı ilə saat 11:30-da “Okinava Arena”da Avstraliya ilə qarşılaşacaq. Hansı komandanın qrupda üçüncü yeri tutacağına bu matçın nəticəsi müəyyənləşdirəcək. Gürcüstanın birinci kanalı və Radio Georgia görüşün canlı reportajını təqdim edəcək.

Xatırladırıq ki, İlias Zurosun baş məşqçisi olduğu komanda birinci qrup mərhələsində keçirdiyi üç oyundan ikisində qalib gəldi və Sloveniyadan sonra ikinci yeri tutaraq qrupdan çıxıb. Gürcüstan yığması ikinci mərhələdə turnirin favoritlərindən olan Almaniya və bir o qədər güclü olan Avstraliya ilə qarşılaşıb. Qrupun elə ilk mərhələsində 1/4 finalçıların kimliyi bəlli oldu – Almaniya Gürcüstanı, Sloveniya Avstraliyanı üstələyib və onlar vaxtından əvvəl pley-offda oynamaq hüququ qazanıblar.

Beləliklə, Gürcüstan millisi Yaponiya səfərini başladığı kimi başa vuracaq – avqustun 22-də Avstraliya ilə yoxlama oyunu keçirib, bu dəfə isə həmin komanda ilə qrup üçüncülüyü üçün mübarizə aparacaq. Avstraliyalılar Dünya Kubokunda Okeaniya komandaları arasında ən yaxşısıdır və avtomatik olaraq Olimpiadaya vəsiqə qazanıblar. “Səlibçilər” isə ilk 16-ya düşərək Olimpiadanın təsnifat mərhələsində çıxış etməyi bacarıb.

Oyundan bir gün əvvəl hər iki komandanın məşqçiləri basketbolçulara dincəlmək şansı vermək qərarına gəliblər. Avstraliya məşqi tamamilə ləğv edib, Gürcüstan millisinin basketbolçuları isə yalnız atışlar üçün yüngül məşq ediblər.

Tornike Şenqelia və Duda Sanadze böyük ehtimalla zədə səbəbindən komandamızda oynaya bilməyəcək. Onlar əvvəlki matçı ağrıkəsici ilə oynayıblar. Mixeil Berişvili də zədəlidir, amma məşqçi İlias Zurosun bizə dediklərinə əsasən, hər şey oyundan əvvəl, həkimlərlə məsləhətləşdikdən sonra həll olunacaq.

“Biz dünyanın ən güclü komandasına qarşı oynayırıq. Avstraliyada doqquz NBA basketbolçusu var. Bu, yüksək tempdə atletik oynayan komandadır. Həmişə olduğu kimi əlimizdən gələni etməliyik. Başa düşürəm ki, məğlubiyyətdən sonra mental cəhətdən yenidən hazırlaşmaq bəzən çətin olur, amma biz bunu bacarmalı, öz oyunumuzu göstərməli və dünya çempionatını ləyaqətlə başa vurmalıyıq”, – deyə baş məşqçi İlias Zuros bildirib.