Ukrayna Avropa Parlamentinin növbəti seçkiləri dövründə Avropa İttifaqına üzv ola bilməyəcək-bu barədə Avropa Parlamentinin vitse-prezidenti Katarina Barli açıqlayıb. Avropa Parlamentinin növbəti tərkibi 2029-cu ilə qədər səlahiyyətlərini həyata keçirəcək.

Almaniya Sosial-Demokrat Partiyasının Avropa Parlamenti seçkilərində əsas namizədi deyir ki, indi konkret tarixlər qeyd etməyin mənası yoxdur. O qeyd edib ki, Ukraynanın təkcə kənd təsərrüfatı sektoru o qədər böyükdür ki, mövcud qaydalara əsasən, yalnız o və başqa bir Avropa İttifaqı ölkəsi Avropa İttifaqının kənd təsərrüfatı subsidiyalarını ala biləcək.

“Ukrayna kimi ölkələri qəbul etmək istəyiriksə, dəyişməliyik”- Avropa Parlamentinin vitse-prezidenti bildirib.

Bundan əvvəl Ukraynanın Baş nazirinin Avropa və Avroatlantik inteqrasiya məsələləri üzrə müavini Olqa Stepanişina bildirmişdi ki, Ukrayna oktyabra qədər Avropa İttifaqının bütün 7 meyarını tam yerinə yetirə bilməyəcək.