Խաղաղության եվրոպական հիմնադրամը տասը միլիոն եվրոյով կաջակցի Հայաստանի զինված ուժերին
Խաղաղության եվրոպական հիմնադրամը տասը միլիոն եվրո օգնություն կտրամադրի Հայաստանի զինված ուժերին: Օգնության միջոցառումների մասին որոշումը այսօր հավանության է արժանացել Եվրամիության խորհրդի կողմից։ Սա առաջին դեպքն է, երբ Եվրամիությունը որոշեց աջակցել Հայաստանին Խաղաղության եվրոպական հիմնադրամից։
Այս աջակցության նպատակն է ուժեղացնել Հայաստանի զինված ուժերի նյութատեխնիկական կարողությունները և նպաստել ճգնաժամային և արտակարգ իրավիճակների ժամանակ քաղաքացիական բնակչության պաշտպանության ամրապնդմանը։ Այն նաև նպատակ ունի ամրապնդել Հայաստանի ճկունությունը և արագացնել նրա զինված ուժերի փոխգործունակությունը՝ երկրի հնարավոր մասնակցության համար ապագա միջազգային ռազմական առաքելություններին և գործողություններին, ներառյալ ԵՄ առաքելությունները:
Ինչպես նշվում է Եվրամիության խորհրդի հայտարարության մեջ, անվտանգությունը Հայաստանի հետ երկկողմ հարաբերությունների աճող տարր է։ Խաղաղության եվրոպական հիմնադրամի այս օգնությունը հետագայում կնպաստի երկրի դիմակայունության ամրապնդմանը:
«Մենք ընդհանուր շահ ունենք ավելի ընդլայնելու մեր երկխոսությունը արտաքին և անվտանգության քաղաքականության ուղղությամբ, ինչպես նաև ակնկալում ենք Հայաստանի հետագա մասնակցությունը ԵՄ առաքելություններին և գործողություններին»,- ասված է հայտարարության մեջ։