Մոտ ապագայում ուժի մեջ կմտնի որոշումը, համաձայն որի ՝ Վրաստանի քաղաքացիները կկարողանան երկիր մուտք գործել միայն վավեր «Փի Սի Ար» թեստերով, առանց պարտադիր կարանտինի  պահանջի: Նրանք կկարողանան բացասական թեստերով մուտք գործել երկիր, այնուհետև անցնել ինքնամեկուսացման մեջ,- այս մասին Նաթիա Թուրնավան հայտարարել է միջգերատեսչական համակարգող խորհրդի նիստից հետո կայացած ճեպազրույցի ժամանակ:

Նրա խոսքով, այս հարցի շուրջ պատրաստվել է կառավարության որոշումը, որն ուժի մեջ կմտնի մոտ ապագայում, և Վրաստանի քաղաքացիները կկարողանան երկիր մուտք գործել միայն վավեր «Փի Սի Ար» թեստի առկայության դեպքում:

Նախարարի խոսքով, սա շատ դրական փոփոխություն է այն առումով, որ ավելի կակտիվանան բիզնեսը և գործնական այցերը Վրաստան:

«Գլխավորն այն է, որ պարտադիր կարանտինը կարող է մարդու ցանկությամբ փոխարինվել «Փի Սի Ար »թեստով: Եթե որևէ մեկը հնարավորություն չունի անցնել թեստը, մենք, իհարկե, կշարունակենք նրանց տրամադրել անվճար կարանտինային տարածքներ», – նշել է նախարարը: