Ժամանակն է դադարեցնել վրացական ժողովրդավարության վրա արտաքին հարձակումները և ճանաչել վրաց ժողովրդի կամքը, որն արտահայտվել է ընտրությունների միջոցով,- այսօր կայացած ճեպազրույցում ասել է Վրաստանի խորհրդարանի նախագահ Շալվա Պապուաշվիլին։

Ինչպես նշեց Պապուաշվիլին, ԵԱՀԿ/ԺՀՄԻԳ-ի զեկույցով բացահայտվեց արմատական ​​կուսակցությունների, հասարակական կազմակերպությունների, Սալոմե Զուրաբիշվիլիի և նրանց օտարերկրյա համախոհների հինգ հիմնական սուտը, որով նրանք փորձում էին խարխլել վրացական ժողովրդավարությունը և ձայներ խլել ավելի քան մեկ միլիոն ընտրողներից:

«Հանրությանը հիշեցնեմ, որ այս մարդկանց ձեռագրում նորություն չկա։ 2012 թվականից հետո սա արդեն ութերորդ ընտրություններն են, որոնք արմատական ​​ընդդիմությունը հայտարարում է կեղծված։ Խոսում են աննախադեպ կեղծիքների մասին, բայց այն ֆոնին, երբ ընդդիմությունը ընտրատեղամասերում ուներ ընդհանուր առմամբ 24 000 հանձնաժողովականներ և նույնքան ներկայացուցիչներ, որոնցից միայն 9-ն էին այլ կարծիք հայտնել տեղամասի արձանագրությունը կազմելիս։ Խոսում են աննախադեպ խախտումների մասին, բայց այն ֆոնին, երբ տեղամասերում եղել են ռեկորդային թվով տեղական և օտարերկրյա դիտորդներ՝ 25 000, և արդյունքում ընդհանուր առմամբ 1200 բողոք է ներկայացվել, մինչդեռ բողոքների թիվը 2020 թվականին 2000-ից ավելի էին։ Խոսում են աննախադեպ բռնության մասին, բայց այն ֆոնին, որ երկու միլիոնից ավելի ընտրող ունեցող 3111 տեղամասերում ժողովրդական պաշտպանի զեկույցում նկարագրվել է բռնության ընդհանուր 13 դեպք, իսկ ԵԱՀԿ/ԺՀՄԻԳ-ը դա անվանել է մեկուսացված դեպքեր։

Այդ իսկ պատճառով, ինչպես նախորդ յոթ դեպքերում, արմատական ​​ընդդիմությունը, ի վերջո, պետք է ճանաչի վրաց ժողովրդի կամքը և վերադառնա ժողովրդավարական շրջանակ։ Միակ ափսոսանքն այն է, որ այդ ընթացքում թանկարժեք ժամանակ է անցնում, և մեր ժողովրդի էներգիան ու էմոցիաները, որոնք պետք է օգտագործվեն մեր երկրի առաջընթացի համար, վատնում են։

ԵԱՀԿ/ԺՀՄԻԳ-ի զեկույցը այն ջրբաժանն է, որտեղ պետք է վերջ դրվի ընտրությունների բարեխղճության վերաբերյալ բոլոր վնասակար շահարկումներին: Ընդդիմությունը ստացավ իշխանության բաժինը, մանդատների քանակը, քանի որ վրաց ժողովուրդը դա անհրաժեշտ համարեց։ Նաև ժամանակն է դադարեցնել արտաքին հարձակումները վրացական ժողովրդավարության վրա և ճանաչել վրաց ժողովրդի կամքը, որն արտահայտվել է միակ օրինական ձևով՝ ընտրությունների միջոցով։

Վերջում ուզում եմ շնորհակալություն հայտնել ԵԱՀԿ/ԺՀՄԻԳ պատվիրակությանը աշխատանքի և ընտրությունների վերջնական զեկույցը հրապարակելու համար։ Իհարկե, Վրաստանի իշխանությունը խորությամբ կուսումնասիրի նրանց հանձնարարականները և կշարունակի համագործակցել ԵԱՀԿ/ԺՀԻԳ-ի հետ՝ հաջորդ ընտրությունները համապատասխան մակարդակով անցկացնելու համար»,- ասել է Պապուաշվիլին։