Իրակլի Ղարիբաշվիլին պատասխանում է «Նամախվան ՀԷԿ»-ի հակառակորդների ցույցի կազմակերպիչներին - Կոչ եմ անում լինեք ողջամիտ, վերջնագրերով խոսելն անընդունելի է, պետությունը կառավարվում է օրենքով և սահմանադրությամբ
Վերջնագրի լեզվով խոսելը կտրականապես անընդունելի է, ես ուզում եմ դիմել բոլոր այդ մարդկանց և կոչ անել լինել ողջամիտ, պետությունը ղեկավարվում է օրենքով և սահմանադրությամբ, – այսպես է դիմել «Նամախվան ՀԷԿ»-ի կառուցման դեմ բողոքողներին, Վրաստանի վարչապետ Իրակլի Ղարիբաշվիլին:
Նրա խոսքով, նրանք, ովքեր դուրս կգան օրենքի սահմաններից, պետությունը կունենա համապատասխան արձագանք:
Միևնույն ժամանակ, ինչպես նշեց վարչապետը, ամսվա վերջին նա կհանդիպի նախագծի ներդրողի, ընկերության հիմնադիրի և սեփականատիրոջ հետ, որի հետ կպարզի մանրամասն հարցերը:
«Մենք ամեն ինչ արեցինք մեր քաղաքացիներին առավելագույն տեղեկատվություն տրամադրելու համար: Այս պատրաստակամությունը մեր կողմից կար, կա և շարունակելու է մնալ: Մենք նաև ցուցարարներին առաջարկեցինք երկխոսության ձևաչափ: Բազմաթիվ փորձեր արվեցին մեր կողմից, իմ անձնական ներկայացուցիչը և մարզպետը նույնպես ներգրավվել են գործընթացին, բոլոր նախարարությունները ներգրավված էին և ներգրավված են: Բացի այդ, կցանկանայինք հիշեցնել, որ մենք հրավիրել ենք Եվրամիության հատուկ ներկայացուցչին մեկ անգամ ևս մանրամասնորեն ուսումնասիրելու այս ծրագրի բոլոր նրբություններն ու մանրամասները, շրջակա միջավայրի վրա ազդեցության հետևանքները: Ես նաև հանձնարարեցի արդարադատության նախարարությանը մեկ անգամ ևս հետազոտել, անկախ իրավաբանական ընկերության կողմից ուսումնասիրել այս նախագծի համապատասխանությունը միջազգային փորձի հետ:
Հետևաբար, չպետք է որևէ հարց լինի: Ես ուզում եմ ձեզ ասել, որ ամսվա վերջին ես կհանդիպեմ ներդրողին, ընկերության հիմնադիրին և սեփականատիրոջը, ով կայցելի Թբիլիսի: Ես ինքս ներգրավված եմ և ուզում եմ մանրամասն պարզել, որպեսզի այս համաձայնագրում ոչ մի հակասական բան չլինի:
Ինչ վերաբերում է վերջնագրի լեզվով խոսելուն, դա կտրականապես անընդունելի է: Այս բոլոր քաղաքացիները պետք է իմանան, որ վերջնագրով խոսելը մութ 90-ականների ժառանգություն է: Մենք լավ հիշում ենք այն մութ շրջանը, երբ բոլոր ակտիվիստները, հայրենասիրության քողի տակ, շատ լավ մասնագետներ էին էներգետիկայի, գյուղատնտեսության, տրանսպորտի, երկաթուղիների և այլնի մեջ: Արդյունքում, դուք շատ լավ գիտեք, թե ինչ ստացանք: Մենք ներքաշվեցինք քաղաքացիական պատերազմի մեջ, մենք ինքներս քանդեցինք երկիրը, ոչնչացրեցինք գործարանները, և ընդհանուր առմամբ մեր երկրի շատ կարևոր մասի օկուպացիան այն ժամանակվա քաղաքականության արդյունք է: Մենք հող ու ջուր ենք կորցրել: Ուստի ես ուզում եմ դիմել այս բոլոր մարդկանց և նրանց կոչ անել լինել ողջամիտ: Պետությունը ղեկավարվում է օրենքով և սահմանադրությամբ: Ովքեր դուրս կգան օրենքի սահմաններից, իհարկե, պետությունը կունենա համապատասխան արձագանք», – հայտարարել է Իրակլի Ղարիբաշվիլին:
