Վրաստանի Հանրային հեռարձակողի և Եվրոպայի հեռարձակողների միության (EBU) համագործակցությամբ, Վրաստանում գործող  տարածաշրջանային ակադեմիան Վրաստանի առաջին ալիքի լրագրողների համար անց է կացնելու թրենինգներ: Թրենինգներին մասնակցելու են ինչպես առաջին ալիքի լրագրողները, այնպես էլ լրագրողներ Հայաստանից և Ադրբեջանից:

2020 թվականի սեպտեմբերի 18-ին անց է կացվելու՝ «որոշումների վրա կենտրոնացած լուրերը հեռուստատեսության և ռադիոհաղորդումների համար» թեմայով դասընթաց: Իսկ սեպտեմբերի 25-ին դասընթաց կանցկացվի ՝ «հինգ քայլ կառուցողական, որոշումների վրա հիմնված սյուժե ստեղծելու» թեմայով: Դասընթացներն անց են կացվելու հեռակա կարգով, զում ծրագրի միջոցով:

Դասընթացի ժամանակ խոսելու են այն մասին, թե ինչպես է հնարավոր լուրերի առավել արդար, համապարփակ, խորը և ճշգրիտ լուսաբանումը,  միևնույն ժամանակ բարձրացնել լսարանի տեղեկացվածությունը կարևոր հարցերի վերաբերյալ:

Որպես հաջող օրինակ բերվելու է, Դանիայի հանրային հեռարձակողի ՝ Public Service (հանրային ծառայություն) ռադիոհաղորդումը:

Դասընթացները վարելու է Եվրոպայի հեռարձակողների միության ակադեմիայի դասընթացվար՝ Մարկ Էգանը: Նրա հետ միասին դասընթացը վարելու են Դանիայի հանրային ռադիոյի P1-ի  Public Service հաղորդման խմբագրական մենեջեր Մորտեն Ռոնելունդը և հաղորդավար Յեսպեր Բորապը:

Դասընթացը նախատեսված է լրատվական բաժնի ղեկավարների, խմբագիրների, լրագրողների և պրոդյուսերների համար:

Վրաստանի առաջին ալիքի և Եվրոպայի հեռարձակողների միության (EBU) համագործակցությամբ և ֆինանսավորմամբ, Վրաստանում մշտական գործող լրագրողական տարածաշրջանային ակադեմիան հիմնվել է 2019 թվականի սկզբին: