Еврокомиссиа ахада Урсула фон дер Лаиен еврокомиссарцәа рыхьӡқәа лҳәеит, – аанацҳаит The Guardian.

Акьыԥхь аинформациа ала, Оливер Варҳеи ицынхәрас Евроеидгыла арҭбаара азҵаарақәа рзы еврокомиссар иҭыԥ ахь Лаиен Марта Кос лкандидатцра ықәлыргылеит. Варҳеи – агәабзиарахьчара азҵаарақәа рзы еврокомиссарс дҟалоит.

The Guardian ишаанацҳаз ала, Жозеп Боррель ицынхәрас адәныҟатәи азҵаарақәеи ашәарҭадаратә политикеи ркомиссарс дҟалоит Естониа ԥасатәи аԥыза-министр Каиа Каллас. Ирландиа ԥасатәи Афинансқәа рминистр Маикл МакГрат икандидатура аиустициа азҵаарақәа рзы еврокомиссар иҭыԥ ахь иқәдыргылеит. Андриус Кубилицс – атәылахьчара азҵаарақәа рзы еврокомиссарс дҟалоит.

Франциа Адәныҟатәи аусқәа рзы аминистр Стефан Сежурне аиндустриатә стратегиа азҵаарақәа аус адиулоит, Марош Шефкович – ахәаахәҭратә политика иазку азҵаарақәа. Австриатәи Магнус Бруннер аҩныҵҟатәи зҵаарақәеи амиграциеи рызҵаарақәа дырхылаԥшуеит, Валдис Домбровскис — аекономикеи ааглыхреи рхырхарҭа. Аенергетикеи анхарҭа азҵаарақәеи рзы еврокомиссар ҿыцс дҟалоит Ден Иоргенсен.

Аԥсабарахьчареи аекономика аконкурентралшареи рызҵаарақәа дырхылаԥшуеит Џьессика Розволл, Вопк Хукстра – аклимат иазку азҵаарақәа.