Қырҭтәылеи Венгриеи рҧыза-министрцәа реицхантәаҩрала, Будапешт, Қырҭтәылеи Венгриеи реиҳабырабжьаратә комиссиа аҩбатәи аилатәара мҩаҧган.

Аҩ-тәылак реиҳабырақәа рылахәылацәа злахәыз аилатәараҿы асектортә аимадарақәа рырҭбааразы иҟоу апотенциал иалацәажәеит. Иаҵшьны иазгәаҭан аенергетикеи, аимадареи, аҧсабарахьчареи, ақыҭанхамҩеи, атәылахьчареи, азинхьчареи, аиустициеи, агәабзиарахьчареи, аҵареи, акультуреи аусхкқәа рҿы аусеицура арҭбаара аҵакы.

Қырҭтәыла аҧыза-министр венгриатәи иколлега ҭабуп ҳәа иеиҳәеит асаммит аиҿкаареи ақырҭуа делегациа гәыкала рыдкылареи азыҳәан.

Қырҭтәыла аҧыза-министр ишиҳәаз ала, зыҩаӡара ҳараку аполитикатә еизыҟазаашьақәа инрываргыланы, ахәаахәҭра-економикатә аизыҟазаашьақәа рырҭбаарагьы иаҵанакәа рацәоуп. Аиҳабыра рнапхгаҩы иажәақәа рыла, ари ахырхарҭала адинамика бзиоуп, аха, аресурсқәа иаҳа ирацәоуп.

Венгриа аҧыза-министр данықәгылоз, аиҳабырабжьаратә саммит аформат аҵакы дазааҭгылеит. Виктор Орбан ишиҳәаз ала, Венгриа абри аҩыза еизыҟазаашьақәа ҩба-хԥа ҳәынҭқаррак мацара рҟны амоуп.

Қырҭтәылеи Венгриеи реиҳабырабжьаратә саммит аҳәаақәа ирҭагӡаны, аганқәа рхаҭарнакцәа, аҧсабарахьчареи, ақыҭанхамҩеи, аиновациақәеи, аспорти аусхкқәа рҿы ҩ-тәылак рыбжьара аусеицура иазку аиқәшаҳаҭрақәа рыбжьарҵеит. Адокументқәа рнапы рыҵарҩит аҩ-тәылак реиҳабырақәа рылахәылацәа. Қырҭтәылеи Венгриеи рҧыза-министрцәа рнапы аҵарҩит Қырҭтәылеи Венгриеи рыбжьара аҩбатәи аиҳабырабжьаратә саммит адекларциа.