«Дарбанызаалак ауаҩы,  иҳәамҭақәеи ихымҩаҧгашьеит ҳтәыла ашәарҭадареи евроинтеграциеи  иаҧырхагазар, иара аглобалтә  «аибашьра апартиа» алахәылас ихы иҧхьаӡар илшоит», — иҳәеит Қырҭтәыла адәныҟатәи аусқәа рминистр Илиа Дарчиашвили  «аминистр исааҭ» аформатаҿ апарламентаҿ адепутатцәа рызҵаарақәа рзы аҭак аныҟаиҵоз.

Иара иажәақәа рыла, евроинтеграциа азҵааразы анапхгаратә гәыҧи аоппозициеи еидгылазароуп.

«Қырҭтәыла европатәи аинтеграциа  —  хымҧада инагӡахо процессуп,  ҳаиҳабыра уи азы иаҭаху зегьы ҟарҵоит. Ҳаиҳабыра роуп Қырҭтәыла европатәи аҧеиҧш аконституциатә нормас иҟазҵаз, ҳара есымша абри ахықәкы анагӡаразы аус аауеит», — иҳәеит  Илиа  Дарчиашвили.

Иара убас, Дарчиашвили ишазгәеиҭаз ала, Қырҭтәыла аҧыза-министри, аиҳабыреи,  анапхгаратә гәыҧи ажәлар ринтересқәа ирызку аполитика мҩаҧыргоит.

«Егьи аганахьала, ҳтәыла адәныҟаполитикатә ҧыжәарақәа рынагӡарагьы ҳаҿуп. Ишәгәаласыршәар сҭахуп,  2010 шықәсазы Урыстәыла атәылауаа рзы авизақәа раҧыхроуп ҳтәыла зегьы реиҳа идуу аҧырхага азаазгаз, абасоуп алабҿабара шыҟоу. Убри аҟынтә, шәара ишәхароу  даҽа џьоукы ирхарашәҵаратәы алшара шәаҳҭом. Ҳара аҳәынҭқарреи ҳажәлари рымаҵ аауеит, ринтересқәа ҳахьчоит, наҟ-наҟгьы убасҵәҟьа инаҳагӡоит», — иҳәеит  Дарчиашвили.