Қырҭтәыла адәныҟатәи аусқәа рминистр Илиа Дарчиашвили атәыла ауааҧсыра даҽазнык акандидат астатус аиура рыдныҳәаланы,  ишиҳәаз ала,  Қырҭтәыла аиҳабыра евроинтеграциа апроцесс аҵыхәанӡа анагаразы иаҭаху зегьы ҟарҵоит.

Иара убас, иара ажурналистцәеи ауаажәлари ирызцәыригеит Евроеидгыла абжьагарақәа рынагӡара иазку аплан.  Ари аплан Еврокомиссиашҟа идәықәҵан.

Аминистр ишиҳәаз ала, актәи абжьагара Евроеидгыла иаҿагылоу адезинформациа  аҿагылара иазкуп. Дарчиашвили ишиҳәаз ала,  атәыла аиҳабыра 2024-2027 шықәсқәа рзтәи акоммуникациатә стратегиа цәырыргахьеит, уаҟа ибзианы иарбоуп адезинформациа аҿагыларазы атәыла аиҳабыра имҩаҧыргараны иҟоу ауснагӡатәқәа.

«Анеҩстәи абжьагара  – Евроеидгыла адәныҟатәи аполитикеи ашәарҭадара аполитикеи азааигәахара иазкуп. Ҳара ари азҵаара иадҳәаланы изныкымкәа ҳгәаанагара ҳҳәахьеит. Еврокомиссиеи ҳареи ари азҵааразы аус еицаауеит.  Евроеидгыла адәныҟатәи аполитикеи арзаҳалқәеи рҟны ашьашәалазаара  50% иаҟароуп.  Ари апроцесс нагӡахоит.  Инеизакны иуҳәозар,  Қырҭтәыла Евроеидгыла адәныҟатәи аполиткиа иашьашәалоуп,  аха,  ҳтәыла адәныҟатәи аполитика  ҳахәаҧшыр,  ҳтәыла ахьыҧшымреи аҵакырадгьылтә акзаареи азы ишәарҭоу зҵаарақәак иҟоуп. Убри аҟынтә,  зҵаарақәак ирыдҳәаланы ҳхатә позициа ҳаман.  Ҳаҧхьаҟа ари ахырхарҭала иаҳа ақәҿиарақәа ҳауеит», — иҳәеит  Дарчиашвили.

Аполитикатә полиаризациа аҧыхра иазку абжьагара иадҳәаланы аминистр ишиҳәаз ала,   атәыла аиҳабыра аинклиузивра аиқәыршәара иазку ашьаҿақәа ҟарҵоит.