«Ауааҧсыра иргәаласыршәар сҭахуп аҵыхәтәантәи апарламенттә алхрақәа раан  «Ақырҭуа гәахәтәы»  48 наӡына абыжьқәа шаиуз, аҵыхәтәантәи аҭҵаарақәа инрықәыршәаны, ҳара иҳадгылоит ҳуааҧсыра 60 наӡына. Ҳәарада,  апарламентаҿ имҩаҧысуа апроцессқәа ирышьҭагыланы, шәнызқьҩыла ауааҧсыра иҳаҳәоит аргама ргәаанагара аарҧшра алшара раҳҭарц», — иҳәеит Қырҭтәыла аҵара аминистр Гьаргь  Амилахвари.

Аиҳабыра реилатәара ашьҭахь аҵара аминистр ишиҳәаз ала, ажәлар реиҿагылара алацәажәарагьы аҭахым.

«Қырҭтәыла атәылауаҩ цыҧхьаӡа агәаанагара аарҧшра азин имоуп. Аҵыхәтәантәи амшқәа рзы уи ибзиаӡаны иубарҭан ҳәа сгәы иаанагоит.  Џьоукы ажәлар реиҿагылара алацәажәара иалагеит, изакәызаалак еиҿагыларак ҟалом. Ҳара ауаажәларреи жәларбжьаратәи ҳпартиорцәеи идҳарбар ҳҭахуп  иахьа  «Ақырҭуа гәахәтәы» ақырҭуа жәлар рыхьӡала ишцәажәо. Иара убас, аргама ааҳарҧшыр ҳҭахуп 5 наӡынак еиҳаны иззеизымгаз аоппозициатә партиақәа Қырҭтәыла ауааҧсыра зегьы рыхьӡала ацәажәара азин шрымам.   Атәыла анапхгара  ауаа амитинг амҩаҧгаразы рзин аҧкра рылшом.   Егьирахь,  шәара лабҿаба ижәбоит жәанызқьҩыла ауааҧсыра  адәахьы идәылҵны, даҽазнык ишышьақәдырҕәҕәо  «Ақырҭуа гәахәтәи» атәылаҿ имҩаҧысуа апроцессқәеи ишрыдгыло», — иҳәеит  Амилахвари.

Апартиа  «Ақырҭуа гәахәтәы» аҳәамҭа иануп: «Ҳадгылаҩцәа рыҳәара иазҧхьагәаҭаны, мшаҧы 29 рзы апарламент ахыбра аҧхьа ажәларзегьтәи аизара мҩаҧаагоит»