Евроинтеграциа азҵааразы Қырҭтәылеи Монтенегрои рыбжьара аконсультациақәа мҩаҧган. Аиҧылара Қарҭ имҩаҧысит. Ақырҭуа аган дырхагылан адәныҟатәи аусқәа рминистр ихаҭыҧуаҩ Ҭеимураз Џьанџьгалиа, Монтенегро – евроинтеграциа азҵаарақәа рзы аҳәынҭқарратә маӡаныҟәгаҩ  Алеқсандр Машкович.

Қырҭтәыла Адәныҟатәи аусқәа рминистрра адыррала, аиҧылара алахәылацәа евроинтеграциа азҵаарақәа рзы Қырҭтәылеи Монтенегрои рыбжьара аҧышәа аиҭныҧсахлара иалацәажәеит.  Ҭеимураз Џьанџьгалиа  иколлега аинформациа ииҭеит евроинтеграциа апроцесс аҿы Қырҭтәыла ақәҿиарақәа ирызкны. Монтенегро аҳәынҭқарратә маӡаныҟәгаҩ  Евроеидгылашҟа Монтенегро аинтеграциа адинамика далацәажәеит.

Аганқәа рхаҭарнакцәа европатәи аконтинент аҿы имҩаҧысуа ахҭысқәа ирызкны ргәаанагарақәа еибырҳәеит.

Қырҭтәыла Адәныҟатәи аусқәа рминистрра адыррала, аганқәа рхаҭарнакцәа ҳаҧхьаҟа евроинтеграциа ахырхарҭала  ҩ-тәылак рыбжьара ҩ-ганктәии аганрацәалатәи усеицура арҭбааразы еиқәшаҳаҭхеит.