Дональд Трамп иӡбарала Америка 66 жәларбжьаратәи аиҿкаарақәа ирылҵит, урҭ иреиуп Венециатәи акомиссиагьы.

Америка Венециатәи акомиссиа иалан  2013 шықәса инаркны, уаанӡа,  1991 шықәса инаркны анаҧшратә статус аман.

Зынӡа, Америка, ЕАР аструктура иаҵанакуа 31 аиҿкаарақәеи ЕАР аструктура иаҵанамкәа 35 аиҿкаарақәеи ирылҵит.

Аҩны шкәакәа аҳәамҭа ишану ала, Америка  «аҧара рацәа нызхуа, иеффективым, ҧырхага зхылҵуа» аиҿкаарақәа ирылҵит.

«Трамп иадминистрациа агәаанагарала, арҭ аиҿкаарақәа имцхәны аҧара нырхуеит, ииашамкәа анапхгара рызуп, урҭ знапаҿы иҟоу акторцәа рхатә усхәаҧштә нарыгӡоит, ҳинтересқәа ирҧырхагоуп, ҳмилаҭ рсуверинитети, рхақәиҭреи, рмышхәыбзазареи рзы шәарҭоуп, изакәызаалак алҵшәак рхылымҵит. Трамп еилыккаа иҳәеит: америкатә жәлар ршьеи, рыҧхӡи, рбеиареи абарҭ аинститутқәа уаҳа ираҳҭом. Америкатә ашәахтәшәаҩцәа иртәу миллиардла адоллар  атәым интересқәа рыхьчаразы ианнырхуаз аамҭа иасхьеит», — иануп Аҩны шкәакәа аҳәамҭаҿы.