Қырҭтәыла аҧыза-министр Иракли Кобахиӡе, аиҳабыра алахәылацәа дрыцны, Гәыриа арегион даҭааит. Қырҭтәыла аиҳабыра рнапхгаҩы, Гәыриа арегионаҿ, Озургеҭи, аҳәынҭқарра ахаҭарнак иадминистрациаҿы акоординациатә штаб аилатәара мҩаҧигеит. 

Иракли Кобахиӡе  асоура ҕәҕәа иахылҵыз апроблемақәеи ауааҧсыра рыцхрааразы еиуеиҧшым аусбарҭақәа имҩаҧырго ауснагӡатәқәеи ирызкны аинформациа еиликааит. Иракли Кобахиӡе ишазгәеиҭаз ала, ауаа излауа ала ирласны ацхыраара рыҭаразы, аусбарҭақәа зегьы рмаксималтә мобилизациа аҵакы ду амоуп. 

Аҧыза-министр иажәақәа рыла, аҧсабаратә рыцҳара аҿагылара апроцессаан аусбарҭақәа зегьы еиқәшаҳаҭны аус руеит. 

Акоординациатә штаб, ауааҧсыра рыцхрааразы, арежим ҷыдаҿ аус ауеит. Аҭыҧашҟа инагоуп излауа ала ирацәаны ауаҩытәыҩсатә ресурсқәеи атехника хьанҭеи. Интенсивла амҩақәа дрыцқьоит. Аҧыза-министр идҵала, асоура ҕәҕәа иахылҵыз апроблемақәа излауа ала ирласны рҭыҧқәҵара амзызла, ари апроцесс рҽаладырхәоит атәылахьчаратә мчқәа.