Қырҭтәыла апарламент, аизарақәеи адемонстрациақәеи ирыдҳәаланы,  Административтә азинеилагарақәа рзакәанеидкылеи Ашьауҕатә закәанеидкылеи рахь аҧсахрақәа аднакылеит.

Аҧсахрақәа инрықәыршәаны, аизара ма адемонстрациа алахәыла асабрадала ихаҿы иҵәахуазар, алаҕырӡ аазго агаз имазар, иара убас, амҩа иркуазар ма аамҭалатәи аконструкциа иргылозар, 15 мшы административтә аҭакра иқәшәоит, иара аизара аиҿкааҩцәа дреиуазар, –  20 мшы административтә аҭакра иқәырҵоит.

Иара убас, Қырҭтәыла Аҩныҵҟатәи аусқәа рминистрра аҳәарала иаанкылатәу аизара ма адемонстрациа аҽалархәразы   60 мшы административтә аҭакра иазҧхьагәаҭоуп. Убри адагьы,  60 мшы аҭакра иқәырҵоит аизараан абџьар, апиротехника, мамзаргьы ауаҩы иҧсҭазаареи игәабзиареи ҧырхага азаагара зылшо иарбанзаалак амаҭәар здырбало  ауаҩгьы.

Абарҭ азинеилагарақәа аҩынтәраан иҟазҵо ауаҩы шықәсыкынӡа аҭакра иқәшәоит, ахынтәраан  — ҩышықәсанӡа аҭакра.

Иара убас, Ашьауҕатә закәанеидкыла астатиа ҿыц алагалоуп, уи инақәыршәаны,  азинхьчаратә органқәа русзуҩцәа ахьымӡҕ рыргаразы ма рзакәантә адҵа анамгӡаразы ашьауҕатә ҭакҧхықәра ҳәаақәҵахоит.