АИШ-ы президент Дональд Трампы фæнды америкаг хæрзаудæн организацитæн фæсарæнты проектты финанскæнынад бауромын. Уый тыххæй хъусын кæны «Нью-Йорк Пост».

Рауагъдад куыд хъусын кæны афтæмæй, Дональд Трамп æмбæлон бардзырд рауадзын аскъуыддзаг кодта. Бардзырдмæ гæсгæ, æнæкоммерцион организацитæн фæсарæнты гранттæ дæттыны бар нæ уыдзæн. Уый хауы, АИШ-ы хъалонтæй ссæрибар чи у, уыцы организацитæм.

Статьяйы банысангонд у, цæмæй кæд æмæ Трампы план сæххæст уыдзæн, уæд арæнæвæрдтæ хаудзысты динон организацитæ æмæ хæрзаудæн фондтæм дæр, кæцытæ фæсарæнты æрдзон фыдбылызты æмæ хæстыты амæттæгтæн æххуыс кæнынц.

«Нью-Йорк Таймс» ахæм организацийы дæнцæгæн æрхæссы World Vision International, кæцы 2023 азы Украинæйæн 70 милуан долларæй фылдæр, Мексикæйæн 11 милуан доллар æмæ Колумбийæн 25 милуан долларæй фылдæр æрвыста. Ахæм организациты номхыгъды ис Америкæйы Сырх Дзуар дæр.

Статьяйы куыд нысангонд у афтæмæй, бирæнымæц стыр хæрзаудæн организацитæ баст сты Трампы критикон адæймæгтимæ. Се æхсæн сты Билл æмæ Мелинда Гейтсы фонд, Чан-Цукербергы фонд æмæ Джордж Соросы гом æхсæнады фонд.

Публикацийы ис фыст, цæмæй Трампы бардзырд раттыны фæдыл æскъуыддзаг нырма æххæстæй арæзт нæу АИШ-ы президенты администрацийы мидæг быцæудзинады тыххæй.